Akukhuthaze nabanye okwenziwe ngumfo kaSimbine
KUNINGI okungalungile ezweni nokwenza ukuthi intsha izithole ibukela kulabo abathanda impilo ewubukhazikhazi efika ngezindlela ezinqamulelayo.
Kuyintokozo ukubona osaziwayo abazimisele ngokuba yisibonelo esihle sokuthi ukubekezela kuzala impumelelo.
Kungakapheli izinsuku ezingakanani umlingisi uNomzamo Mbatha ethole iziqu zeB Com Accounting ngemuva kokuwa evuka ebhekene nezihibe zempilo, kulokhu sishayela ihlombe umgijimi u-Akani Simbine. Uwuqophe kabusha umlando wezokusubatha eNingizimu Afrika eba ngumpetha wamaCommonwealth Games ebangeni lika-100m.
Indlela kaSimbine ebheke empumelelweni ayiqalanga kalula. Eminyakeni edlule ugeje kancane ekutholeni indondo emiqhudelwaneni emikhulu. Uke waphoxeka eqeda endaweni yesihlanu kabili, kwi-IAAF World Championship (e-England ngonyaka odlule) nakuma-Olympic (ngo-2016 eBrazil).
Kodwa kukho konke lokho akazange adikibale uvuke wazithatha. Nyakenye uthole iziqu ze-Information Science e-University of Pretoria.
Ukunqoba kukaSimbine ku-100m kufanele kukhuthaze abasubathi abasakhula babone ukuthi bangagcina beyizingqwele zomhlaba uma bezimisela futhi bebekezela.
Inselelo isikwiziphathimandla ze-Athletics South Africa (ASA) neSascoc ngokuthi zifake imali kulo mdlalo. ISascoc izokhokhela abagijimi uR55 000 ngamagolide abazobuya nawo. Abathole isiliva bazohlomula ngoR25 000 noR15 000 wethusi. Lena akuyona imali enkulu uma ubheka ukuzikhandla kwabadlali iminyaka emine belwela ukuyomela izwe.
I-ASA ingashayelwa ihlombe ngokuthi iyazama ukubuyisa abaxhasi kwezokusubatha njengoba yenzile ithola iLuquid Telecom efake isandla kwi-Athletic Grand Prix ngenyanga edlule. Lolu chungechunge lwemilenze emithathu lunike uSimbine nozakwabo ithuba lokuzicijela amaCommonwealth Games. Le nkampani ifake imali elinganiselwa kuR1.3 million kulona.
Yenza lokhu nje ibisanda kusayina isivumelwano sika-R8 million noSimbine seminyaka emithathu. Njengoba eseqalile umfo kaSimbine, sithi angabe esabheka emuva useyicabile indlela ebheke esicongweni somhlaba.