UliFezile iphupho ngendawo ayidlalayo
UMLINGISI womdlalo iThe Queen, uFezile Makhanya olingisa indawo kaTebogo useveze ukuthi inkampani ephethe lo mdlalo ike yamnxusa ukuthi aqaphele uma ehamba ezindaweni ezehlukene okugcwala kuzo umphakathi ngenxa yendawo ayilingisayo.
Uthi lokhu bakusho kulandela izinto ezikhulunywa ababukeli balo mdlalo ngenxa kaTebogo ohlukumeza intombi yakhe uKea Khoza.
Laba balingisi bangundabamlonyeni kuleli muva nje njengoba uFezile oqale ukubonakala ekuqaleni kwale nyanga, ehlukumeza uKea ngokumshaya aphinde amthathele izinqumo ezijabulisa yena kuphela.
Ekhuluma ohlelweni iV-Entertainment ku-1Magic, uFezile uthe uyazifela ngale ndawo.
“Emdlalweni i-Unmarried nakhona ngibonakale ngilingisa indawo yowesilisa ohlukumeza owesifazane abesethandane nanye iminyaka. Wamshiya wayoshada nomunye. Kuzona zombili lezi zindawo engizilingisayo ngizijabulele njengoba bengihlala ngibonakala kweminye imidlalo ngiwumuntu ophansi futhi oyikholwa,” kuchaza yena.
Uthe ngemuva kokuthi abantu bedinwe indawo kaTebogo ezinkundleni zokuxhumana, uhlale ethola imiyalezo ehlukene.
“Abantu besilisa bayangibuza ukuthi ngizoyiyeka nini le nto engiyenzayo kuKea, ngisho abesifazane nabo bahlale bengitshela ukuthi into engiyenzayo abayithandi,” kuchaza uFezile.
Uthe endimeni yokulingisa asebe kuyo iminyaka engu-15, uyazi ukuthi usekwenze konke njengoba angena kuwo ngenxa yokunxuswa udadewabo.
“Usisi wami uyena owangikhuthaza ukuthi ngingene ekulingiseni futhi wajabula uma ebona izinto zingihambela kahle. Ngisho indlela umzimba wami obukeka ngayo manje unkosikazi wami owangidonsela ekutheni sizivocavoce, ngakho abesifazane abasempilweni yami babe nelikhulu iqhaza,” kuchaza yena.
Ngaphandle kokulingisa okuyinto ayithandayo, uFezile uthe uyazifela ngesonto njengoba engaphuthi enkonzweni.