Ihlehliswe ngenhloso imiklomelo
UMHLELI wemiklomelo yemidlalo yethelevishini ewuchungechunge, amaRoyalty Soapie Awards obekumele abe ngenyanga edlule, uWinnie Ntshaba, uthi bawahlehlise ngenhloso ngoba kunohlelo lokuthuthukisa intsha abafuna ukulwethula. Ngasekupheleni konyaka odlule uWinnie wamemezela ukuthi imiklomelo iyabuya ngemuva kokuhlaba ikhefu leminyaka emibili. Waveza ukuthi imidlalo nabalingisi sebengaqala bangenele futhi imiklomelo izoba seNkosi Albert Luthuli International Convention Centre (ICC), eThekwini, ngoMashi 17. “Kukhona uhlelo olukhuluma nentsha ngqo esizolwethula ngoba asifuni ukuthi umcimbi ube yinto yosuku olulodwa kuphela. Ngibakhathelele abantu abasha, ikakhulukazi basemakhaya ngoba nami ngiqhamuka khona,” kusho uWinnie. Uthe uhlelo abazolwethula ngolokuhlomisa abantu abasha ngolwazi kwezokulingisa futhi bazoya kubo ngqo. “Abantu abaningi bacabanga ukuthi uma ukhuluma ngemboni ukhuluma ngokulingisa kuphela. Sifuna ukufundisa abantu ukuthi kuningi abangakwenza. Sizoya kubo ngqo ngoba imboni akufanele ibe sesifundazweni esisodwa. Kumele iLimpopo izenzele yona imidlalo yayo, iKwaZuluNatal kanjalo nezinye izifundazwe zenze njalo.” Uthe okubenze bangawenza kule minyaka emibili eyedlule yingoba bebenenkinga yabaxhasi. “Uzokhumbula ukuthi kwaba khona izinto ezifana no#Fees Must Fall. Esibambisene nabo bathi kunezinto eziphuthumayo okumele babhekane nazo ngakho ngeke bakwazi ukuxhasa umcimbi wosuku olulodwa. Sibe sesenza ucwaningo ngokunye esingakwenza ukuze kungabi nje yinto yobukhazikhazi bosuku olulodwa kodwa kusizakale nabantu.” Uqhube wathi banabo abaxhasi futhi basaphothula izinto nabanye. Ubale uMnyango wezobuCiko namaSiko kuzwelonke njengabaxhasi abakhulu. “Bayawuqonda umbono wethu wokuthi sikhulise imboni. Kumele ibuye ize kithi ngoba izindaba zethu lezi ezixoxwayo.” Uthe imiklomelo isizoba se-ICC ngoJuni 16. Abaqokiwe bazomenyezelwa emcimbini ozoba seGoli kusasa.