UVilakazi usayine eyesibambiso noSuthu
AKANAGQUBU ngomdlali wakhe osesayine inkontileka yesibambiso naMaZulu umqeqeshi weFree State Stars uLuc Eymael.
UNhlanhla Vilakazi oyinjini yeStars enkabeni yenkundla usanda kusayina inkontileka yesibambiso noSuthu.
Ngempelasonto ubephethe ibhande ngesikhathi ezakhe zidlala ngokulingana neLamontville Golden Arrows ngo 1-1 ePrincess Magogo Stadium, KwaMashu koweAbsa Premiership.
UVilakazi uzoqala ukugijima kuMaZulu ngesizini ezayo. U-Eymael exoxa nabezindaba ngoVilakazi ukubeke kwacaca ukuthi ngeke awenze umkhuba owenziwa ngamanye amaqembu wokuduvisa umdlali ebhentshini ngoba nakho esazi ukuthi useyahamba.
“Yebo kunjalo (uya kuMaZulu). Yisinqumo esithathwe ngumdlali uqobo lwakhe. Uyazi yena ukuthi kungani ethathe isinqumo sokusayina inkontileka yesibambiso naMaZulu. Simfisela inhlanhla eqenjini lakhe elisha. Ngizoqhubeka nokumethemba. Wenza kahle. Mina angihambisani nabantu abaduba abadlali uma bengafuni ukuvuselela inkontileka noma abakhuhlisa umdlali ngebhentshi ngoba nakhu kuthiwa uyahamba,” kusho u-Eymael.
UVilakazi (31) usedlale esigabeni esikhokhelayo iminyaka engu-10. Uqale ukuyibamba esigabeni esikhokhelayo ngo-2008 kwi-Arrows. Ngemuva kwalokho ujoyina iBay United kwathi ngo2010 wasayiniswa yi-Ajax Cape Town.
Ku-Urban Warriors yilapho efike wagqama khona waphinde wazakhela ugazi kubathandi bakanobhtshuzwayo. Uhlale amasizini amathathu ngemuva kwalokho wadlulela kuMaritzburg United. KwiTeam of Choice uyihlikihle kuyona amasizini amabili njengoba esekwiStars asijoyine ngo-2015. “Abukho ubuntu uma uzohlukumeza umdlali ngoba ehamba. Uma kumfanele ukudlala sizoqhubeka nokumbophela esikimini kuze kuphele isizini.”Umdlali ongazange abonakale kule midlalo emibili eyedlule yeStars nguMohamed Anas. “U-Anas usephuthwe yimidlalo emibili. Akalimele futhi akadonsi isigwebo samakhadi. Angimfakanga eqenjini ngoba ubengakufanele ukuba yingxenye yeqembu. Akangigculisi ejimini. Uma esenkundleni akawasebenzisi amathuba engimnika wona.”
U-Anas ugaqelwe ngamaqembu anonhlonze okubalwa kuwona iBidvest Wits, SuperSport United neCape Town City.