IPirates nomqansa wokuqeda ukucanasa kweSuperSport
IHLALELWE wumqansa wokuqeda ukucanasa kweSuperSport United namuhla ngo-7.30 ebusuku i-Orlando Pirates ezotholana phezulu naMatsatsantsa A Pitori emdlalweni we-Absa Premiership oseMbombela Stadium, eNelspruit, eMpumalanga.
ISuperSport isiyiphuze inyongo iBucs kula masizini adlule. Namuhla ebusuku kuzovuka iminjunju uma la maqembu esetholane phezulu. Egcina ukuhlangana eMbombela ngesizini edlule, iSuperSport yalobola eZimnyama ngo 6-1 okwaholela ekutheni owayengumqeqeshi wePirates uMuhsin Ertugral afake isicelo sokwesula kuthelevishini.
Ekupheleni kwesizini edlule Amatsatsantsa aphinde ahlangana neBucs kowamanqamu weNedbank Cup eMoses Mabhida Stadium, eThekwini.
Kulo mdlalo iSuperSport ibhudluze eZimnyama ngo 4-1. Emzuliswaneni wesibili weligi ngesizini edlule iPirates neSuperSport babambane ngo 1-1.
IPirates sekuphele iminyaka emithathu yagcina ukwehlula iSuperSport. Sebedlale imidlalo eyisishiyagalombili ilandelana eZimnyama zihluleka wukuthola iwini. IBucs yagcina ukushaya iSuperSport ngoMashi 29 ngo2015 ngesikathi beyibhabhadisa Amatsatsantsa ngo 4-1 e-Orlando Stadium,eSoweto, eGoli. Ngemuva kwalokho-ke iPirates ayikaze iphinde iphumelele uma ibhekene neSuperSport kweyeligi nasemidlalweni yemikhumulajezi.
Ngesizini edlule la maqembu ahlangane amahlandla amane. Atholane phezulu kabili kwiligi aphinde adudulana kabili emidlalweni yemikhumulajezi. Kweyomkhumulajezi iPirates iphume enkundleni ikhihla esikaNandi iSuperSport iyithela othulini ngo 1-0 kuma-semi final eTelkom Knockout. Leli rekhodi elibi nokuphushwa ukuvala igebe esicongweni seligi kufanele ukuthi yikhona okuzobe kuphusha abadlali bePirates emdlalweni wakusihlwa.
EZimnyama zihlezi endaweni yesibili kwi-log ye-Absa Premiership ngamaphuzu angu-45 emidlalweni engu-25. Zihlukaniswe amaphuzu amane neMamelodi Sundowns eqhwakele.
IPiratesisinqobe imidlalo emihlanu ilandelana kwiligi. ISuperSport yona idonsa kanzima, ibalwa namaqembu azama ukubalakela izembe. Isendaweni yesithathu uma isuka ekugcineni. Inamaphuzu angu-27 emidlalweni engu-25. Ihlukaniswe amathathu ne-Ajax Cape Town ehlezi endaweni yesibili uma usuka ekugcineni. Amatsatsantsa awakaze anqobe emidlalweni emihlanu eyedlule yeligi. Uma iPirates inqoba izobuye inciphise igebe phakathi kwayo neSundowns libe yiphuzu elilodwa ngaphambi kweyangempelasonto ye-Absa Premiership.