OwamaProteas uthole iqembu elisha e-England
ISILOMO somshwibi wakuleli, uMorne Morkel, esisanda kuthatha umhlalaphansi kwi-cricket ezingeni lomhlaba sesijoyine iqembu lase-England, iSurrey lapho sisayine khona inkontileka yeminyaka emibili.
UMorkel (33) uthe khumu kumaProteas kule nyanga ngemuva kokuwasiza enqoba okokuqala kuleli i-Australia emidlalweni ye-test.
Lo mdlali uthathe ama-wicket angu-309 emidlalweni engu-86 yama-test.
Manje usezokwazi ukudlalela iSurrey ezinze e-The Oval, eLondon kulona lonke uhlobo lwe-cricket kuze kuphele isizini ka-2019.
“Ngizizwa ngikhethekile ngokuthi iSurrey iqoke mina ukuthi ngiyijoyine ngemuva kokuthatha umhlalaphansi emidlalweni yomhlaba. Ngiyakukhumbula esikwenze neNingizimu Afrika e-Oval futhi ngikubheke ngabomvu ukuzinza eLondon nomndeni wami kuleli hlobo, ukwenza abangani abasha nokuhlangana nozakwethu abasha. Ngithemba ukuthi sizokwenza kahle enkundleni nangaphandle kwayo,” kusho uMorkel esitatimendeni esikhishwe yiqembu izolo.
Umqondisi we-cricket kwiSurrey u-Alec Stewart, uthe: “Ngemuva kokusula kwakhe ezingeni lomhlaba ngiyajabula kakhulu ukumemezela ukuthi uMorne usesayine inkontileka okungenani yeminyaka emibili nathi. Wenze ezibukwayo neNingizimu Afrika, ungumdlali ozoletha amava esikwatini sethu. Ukulambela kwakhe ukudlala kuhlale obala siqala ukukhuluma naye.”
Imithetho yeKolpak (okuyinkontileka ekuvimbela ukuthi udlalele izwe lakho) iyakuvumela ukuthi amaqembu ase-England asayinise abadlali bangaphandle. Kodwa laba badlali ababe besakwazi ukumela amazwe abo ngoba ibona abasuke sebenegunya lokubalawula. Imithetho yayo iqale ukusebenza ngo-2003 kanti abadlali bakuleli osekuke kwasuka umsindo ngabo ngenxa yayo, nguRilie Rossouw noKyle Abbort abashiye kumaProteas ngoba sebethole amaqembu e-England.
Isizini ye-English County Championship iyaqala ngoLwesihlanu. Umdlalo wokuqala weSurrey ungo-Ephreli 20 lapho izobe ibhekene nezimbangi iHampshire khona e-Oval.