UKhan ugxeke abalandeli beChiefs
USIHLABE wasihlikiza isenzo sabalandeli beKaizer Chiefs owayeyiphini likaTed Dumitru ngo-2004/05, uFarouk Khan ngesikhathi Amakhosi ekhala emuka nesicoco seCastle Premiership.
Ngempelasonto edlule iChiefs ithelwe ngehlazo lika 3-0 emdlalweni we-Absa Premiership obuseFNB Stadium, eSoweto, eGoli ngesikhathi ibhekene neChippa United.
Isibhaxu sichaze ukuthi sekuphelile ngenhlasi yethemba yeChiefs yokunqoba isicoco seligi kwazise manje isisele ngamaphuzu angu-10 kwiMamelodi Sundowns eqhwakele. Amakhosi aphambili ngomdlalo kwiSundowns.
Abalandeli bavuke umbhejazane bajikijela amavuvuzela nezigubhu enkundleni bekhombisa ukungenami kwabo ngokubhacaza kweqembu. Abanye bashaye ingoma echapha isikhulu seqembu uBobby Motaung ngenhlamba.
UKhan owadla isicoco seligi neChiefs ngo-2004/05 utshele leli phephandaba ukuthi akahambisani nesenzo sabalandeli beChiefs yize esiqonda isimo ababhekene naso. “IChiefs yiqembu elikhulu. Abalandeli bayo bahlale befuna impumelelo ngaso sonke isikhathi kodwa lokho akusho ukuthi kumele babulale impahla enkundleni noma bajikijele abadlali, izikhulu nomqeqeshi. Kunemigudu okumele bayilandele. Yilapho-ke okumele bayozwakalisa khona ilaka labo hhayi ukuthi baziphathe ngale ndlela abaziphathe ngayo. Indlela abaziphathe ngayo ayamukelekile. Ayidwebi isithombe esihle ngeqembu nangeligi yethu. Lapha kunabafana abancane beChiefs abagijima eqenjini lika-Under-17 abebezothamela umdlalo. Isenzo sabalandeli sizobalimaza labafana abancane abanephupho lokugijima eqenjini elikhulu leChiefs.”Amakhosi sekuphele amasizini amabili eshwiba izandla. Agcina ukunqoba isicoco kusekhona uStuart Baxter ngo-2014/15 ngesikhathi ekhala emuka nesicoco seligi neseMTN 8. Selokhu izintambo zathathwa nguSteve “Mphathi” Komphela leli qembu alikaze liphinde liwine lutho.
Njengamanje amathemba alo okuqeda indlaba yezicoco aselele kwiNedbank Cup. Ngo-Ephreli 21, azobhekana neFree State Stars kwi-semi final yeNedbank Cup eMoses Mabhida Stadium, eThekwini.
“Akulula ukucija iChiefs. Uma izinto zihamba kahle uba yisithandwa sabo bonke abantu kodwa uma sezibheda ujikelwa yibona. Kumele ulethe izicoco ukuze ubenogazi. Mina angiboni ukuthi kumele bamdedele uKomphela. Abaqeqeshi bomsinsi wokuzimilela kuleli kumele basekwe. UKomphela udinga umuntu onesipiliyoni azomsiza ebhentshini. UPatrick Mabedi akanaso isipiliyoni. Njengamanje uKomphela kufana nokuthi uyedwa lapha ebhentshini. Le ndoda yaseHolland ngeke ngiphawule ngayo kakhulu ngoba angiyazi. Amagalelo ayo futhi nawo angiwazi. IChiefs ayibhedi ngale ndlela abantu abasho ngayo. Inkinga wukuthi ayinawo umggqigqo. Isikhathi esiningi idlala ngokulingana,” kusho uKhan.
Indonda yaseHolland akhuluma ngayo uKhan, uRob Hutting oyinhloko yosomaqhinga oqashwe ngoJanuwari.
Inkontileka yeChiefs noKomphela iyaphela ngoJuni. NgeSonto izobhekana nePlatinum Stars koweligi e-FNB Stadium ngo-3 ntambama.
“IChiefs inabo abadlali. Emapalini ino-Itumeleng Khune kanti emuva kukhona uRamahlwe Mphahlele, Daniel Cardoso noTeenage Hadebe. Emuva iqinile. Ifakazelwa wukuthi iyona esangenelwe amagoli amancane. Esiswini kukhona uSiphiwe Tshabalala, Joseph Molongoane, Siphelele Ntshangase noWillard Katsande. Phambili kukhona uLeonardo Castro, Bernard Parker noRyan Moon. Awukwazi-ke ukungitshela ukuthi leli qembu liwuvucu,” kusho uKhan.