ZIZOQINA EZOKUPHEPHA EMABHIDA KOWE-CHIEFS KWINEDBANK CUP
ABAPHATHI beMoses Mabhida Stadium anavalo ngokubhacaza kweKaizer Chiefs nabalandeli bayo abangazange baziphathe kahle ngempelasonto edlule ngesikhathi ilotsholwa yiChippa United ngo 3-0 e-FNB Stadium, eSoweto, eGoli kowe-Absa Premiership.
Abalandeli beChiefs bebedinwe begane unwabu. Bajikijele izigubhu namavuvuzela enkundleni beveza ukungenami kwabo ngokushaya udaka kweqembu labo. Abanye babonakale ezithombeni behluntula uwaya okuhlukaniswa ngawo indawo abahlala kuyona nekundla.
Baphinde bachapha ngenhlamba isikhulu seqembu uBobby Motaung abamsola ngokuba nomthelela ngokubhimba kwezinto kuMakhosi. UVusi Mazibuko oyimenenja eMabhida ukusho kwagcwala umlomo ukuthi abathukile ngesigameko saseFNB. Ngo-Ephreli 21 iChiefs izobe ingosokhaya uma isibhekene neFree State Stars kowandulela owamanqamu kwiNedbank Cup.
“Sikhathazekile ngendlela abalandeli beChiefs abaziphathe ngayo kodwa asithukile. Sinesipiliyoni sokusingatha imidlalo emikhulu. Ezokuphepha zizobe ziqine kakhulu. Sizokwenza isiqiniseko sokuthi impahla iphephile enkundleni. Abalandeli bazoza ngobuningi babo ngoba phela leli yithuba lokugcina leChiefs lokunqoba isicoco,” kusho uMazibuko.
Abazowina kulo mdlalo bazodudulana neMamelodi Sundowns noma neMaritzburg United abazotholana phezulu kwisemi final yesibili eseHarry Gwala Stadium ngo-Ephreli 22.
Umdlalo wamanqamu useKapa ngoMeyi 19. Ukushaywa kweChiefs ngempelasnto kuyikhiphile embangweni wesicoco seligi.
“Siyaxoxa nePremier Soccer League ngokuthi amathikithi atholakale naseMabhida.
“Uma izingxoxo zethu ziba yimpumelelo lokhu kuzokwenzeka ngoMsombuluko. Amathikithi atholakala e-ticket Pro hhayi eComputicket. Ngakho siyabacela abantu ukuthi bathenge amathikithi kusanesikhathi ngoba akuzona zonke izitolo zakwa-Ticket Pro ezidayisa amathikithi,” kusho uMazibuko.
Phambilini abalandeli beChiefs sebeke bazama ukokhela ngomlilo umpheme womhubhe ophuma abadlali nabaqeqeshi bedinwe uKomphela nezakhe.