IBaroka isemseni wePirates ngoMotupa
IBAROKA ilindele noma yini ngomgadli emboleke kwi-Orlando Pirates, uGift Motupa, oyishayele amagoli abalulekile kule sizini.
UMotupa, owadayiswa yiBaroka kwiPirates kumasizini adlule, uthwale kanzima ukuthola ijezi kweZimnyama ngesizini edlule. Ungomunye wabadlali abangayitholanga indawo ngaphansi kukaMilutin “Micho” Sredojevic owenze izinguquko eziningi kwiPirates kusuka efikile ekuqaleni kwesizini ka-2017/2018, okugcine ngokuthi abolekiswe kwiBaroka.
UMotupa uyisebenzele kanzima iBaroka kodwa iyazi ukuthi ingazithola sekufanele ibheke omunye umgadli uma iPirates ingavumi ukumbuyisa ngesizini ezayo. UMotupa usevele uyibuka nezihlwele imidlalo yeBaroka. Ngempelasonto edlule, iBakgaga ihlulwa yiMamelodi Sundowns ngo-2-1, endaweni kaMotupa bekudlala uLucky Nguzane oshaye igoli.
Umqeqeshi weBaroka, uMcDonald “Bambino” Makhubedu, uthe uma ehamba uMotupa bazokwamukela lokho.
“ULucky umfana onamandla. Asibheke amarekhodi abo. UGift ubekade esishayela amagoli, ungomunye wabahamba phambili kwi-ligi. ULucky unomlando omuhle, udlale e-Europe, kwiSundowns nakwi Golden Arrows. Udlale emaqenjini amakhulu. Udlale nasemaqenjini esizwe amancane. Bacishe bafane. Uma uGift ehamba sizothola omunye. IBaroka iyohlala izama ukuthola abafana abancane abahle. Asibakhumbuli abadlali lapha. UGift uyalazi ibhola kodwa asibalisi ngabadlali, uma wenza lokho ukhombisa ukuthi kukhona okungalungile ngawe. Mina ngizosebenza nganoma ngabe yini enginikwe yona. Uma ehamba kulungile, uma ehlala kusalungile nalokho,” kusho uMakhubedu.
IBarola iqale kahle isizini, yahlala esicongweni seligi yePremiership. Ngokuhamba kwesikhathi ziqalile ukubhimba izinto, yazithola isibheke emsileni we-log. Ukuthatha izintambo kukaMakhubedu kubukeke kuyivusile iBaroka. Izokwamukela iMaritzburg United emdlalweni weligi ozoba sePeter Mokaba Stadium, ePolokwane, ngeSonto ngo-3 ntambama.
“Sifuna ukulwela ukuqeda isizini endaweni yesihlanu. Siyiqembu elihle kodwa uma kungenzeki ayikho inkinga. Kufanele sizame kakhudlwana. Sidinga ukuwina imidlalo eyisihlanu esisalele. Kungaba kubi uma singaqeda ngaphandle kweTop 8 ngoba sinezifiso futhi iBaroka iyakhula. Sike sahlala phezulu, sahlala endaweni yesine, sehlela kweka-12. Manje sesibuyele kwi-Top 8. Sidinga ukuwina ngoba sinabadlali abasezingeni eliphezulu,” kusho uMakhubedu.