Wenze okulindelwe ethola indondo
ULUVO Manyonga akazange aphoxe enza njengoba bekulindelekile ethola indondo yegolide kwi-long jump kumaCommonwealth Games, e-Australia ngemuva kokugxuma ayofinyelela ku-8.41m kweyamanqamu izolo.
Uzakwabo wakuleli, uRaswahl Samaai uthole ithusi okwesibili kulandelana njengoba nango2014 eGlasgow waphuma indawo yesithathu. Yena ugxume wafinyelala ku-8.22m.
UManyonga ongumpetha womhlaba uye kogxuma okokugcina evele ehamba phambili njengoba ebeshaye ibanga elingu8.36m ephuca igolide uHenry Frayne wase-Australia obegxume u-8.33 ngaphambi kwakhe.
Igolide lakhe layizolo nalithole kwi-IAAF World Championship eLondon nyakenye lizobalwa nesiliva abuya nalo kuma-Olympic Games ayeseBrazil ngo-2016.
Lezi izindondo ezisemqoka ezingeni lomhlaba, uManyonga uzithole ngemuva kokulwa anqobe impi yezidakamizwa ayebhekene nazo. Igolide layizolo lona lilandela ithusi alithole kwi-IAAF World Indoor Championship ngenyanga edlule.
USunette Viljoen odlala i-javelin naye akazange aphoxe ethola ithusi ngemuva kokuphosa u-62.08m. Ushaywe izintokazi zase-Australia uKathryn Mitchell endaweni yokuqala noKelsey-Lee Roberts kweyesibili. Indawo aqede kuyona uViljoen imele ukushayelwa ihlombe uma kubhekwa ukuthi lona bekuwumqhudelwano wakhe wokuqala kulandela ukuhlala unyaka wonke odlule elimele.
Kwezokusubatha uClarence Munyai nguyena osephethe amathemba endondo ku-200m ngemuva kokuthi uzakwabo u-Anaso Jobodwana eshaywe ngekhadi ngemuva kokusuka kuqala.
Kube nebohlololo sekuqhamuka izindaba zokuthi uJobodwana ngeke esagijima kowamanqamu namuhla ntambama. Izolo kuqhubeka eyandulela owamanqamu, uthole ikhadi eliluhlaza elifana nesexwayiso ngemuva kokusuka kuqala. Uqhubekile nokugijima waqeda endaweni yesibili embimfaka kowamanqamu. Kodwa ulale esetshelwe ukuthi usehoxisiwe.
UJobodwana akaqali ukuhoxiswa emqhudelwaneni ngendlela efanayo. Wasuka kuqala ku-100m kumaWorld Champs ngo-2015. Kodwa ngaleso sikhathi kwasabalala ukuthi wenza ngabomu ngoba engafuni ukugijima kuleli banga. Amanye amathemba ezindondo eNingizimu Afrika kumaCommonwealth asongwa ngeSonto, asesele kuCaster Semenya ku-800m naseqenjini labesilisa leSevens Rugby nelerelay.