Kumiswe Ugu Jazz Festival ngesixakaxaka sethenda

Isolezwe - - IZINDABA - NOKUBONGWA PHENYANE

ISIXAKAXAKA ngethenda yokwenza umcimbi omkhulu we-jazz obuwaziwa ngoGu Jazz Festival sidale ukuthi kusungulwe umcimbi omusha owaziwa ngoGu Jazz Art Festival.

Ithenda yokuhlela lo mcimbi obuwenziwa inkampani kaSiyabonga Msomi, iCyassound Holdings, iphele ngonyaka odlule.

Bekulindeleke ukuthi kumenyezelwe maduze abazosingatha ukuhlelwa kwalo mcimbi kodwa lokho kwangenzeka.

Esitatimendeni esikhishwe yinkampani iCyassound Holdings izolo, sithe bayasemukela isinqumo esithathwe uMasipala Ugu sokumisa umcimbi Ugu Jazz Festival.

“Siqhamuke nomcimbi oxube okuningi kunalo obujwayele ukwenzeka. Lona ozoqala kulo nyaka uzobe uqukethe abaculi abacula izinhlobo ezahlukene zomculo wakuleli, ingqungquthela ezobe ifundisa ngomculo, umcimbi wokuvula, umcimbi omkhulu ne-picnic eyoba ngosuku lokugcina. Siyabonga kakhulu kumasipala ngokusithemba ngalo mcimbi kusuka ngo2011 kuze kube wunyaka ophelile, bekungumcimbi omkhulu lona obekungabi lula ukuwuhlanganisa,” kusho uSiyabonga.

Uthe ngeke abashiye ngaphandle bonke abaxhasi ababe nabo yonke iminyaka behlanganisa lo mcimbi.

“Ngenxa yobudlelwano inkampani ibisenabo nabantu abaningi abasuke behambele Ugu Jazz Festival, sikhethe ukuthi singabalahli uma kuqhamuka izinkinga kodwa sibahlelele Ugu Jazz Art Festival ngoJuni 30, enkundleni yezemidlalo Ugu Sports and Leisure, ePort Shepstone,” kuchaza uSiyabonga.

Isithombe: SITHUNYELWE

USIYABONGA Msomi oseqhamuke nomcimbi ohlukile we-jazz ozoba sePort Shepstone ngoJuni ngemuva kokumiswa komcimbi obuwaziwa ngoGu Jazz Festival

Newspapers in Zulu

Newspapers from South Africa

© PressReader. All rights reserved.