Uvalo emndenini okhishwe ehostela washiselwa izimpahla

Isolezwe - - IZINDABA - LUNGI LANGA

UNOVALO umndeni wasehostela laseMlaza, iSeventini okuthiwa ushiselwe impahla kubangwa igumbi lokuhlala.

Baphenduke omantunta nendishi abomndeni okuthiwa bangenelwe abantu ngoLwesihlanu ebusuku bashiselwa izimpahla ngoba kuthiwa izingane zakhona azinalo igunya lokuhlala kwelinye lamagumbi asehostela. Kuvame ukuthi kuhlale imindeni eyahlukene emagumbini ehostela elilodwa bese kusetshenziswa ngokuhlanganyela indlu yangasese nekhishi.

UMnuz Vusumuzi Khanyile (45) uthe benomndeni wakhe sebequba ezihlotsheni emuva kokuthi kufike abantu okuthiwa basekomitini elibhekele ukuhlala kwabantu ehostela bathi akakhiphe amadodakazi akhe amabili eneminyaka engu-23 neneminyaka engu17 ngoba bethi awanalo igunya lokuhlala kwelinye lamagumbi asendlini abahlala kuyona ehostela. UKhanyile ohlala nezingane zakhe eziyishiyagalolunye uthe bebebaningi kakhulu egumbini lakhe wase ehlela ukuthi ezinye zihlale kwelinye lamagumbi ngesikhathi kuphuma omunye ababehlala naye.

“Ngangilande izingane zami emakhaya ngoba ngenzela ukuthi zizoqhubeka nokufunda ngala. Besihlala sonke kusuka ngizilandile ngo-2015. Kuthe uma kuvuleka isikhala kwelinye igumbi endlini esihlala kuyona ngaya kocelela izingane kunsumpa ukuba zingene kulo. Ngathenga nomjondolo ngenzela ukuthi kuhlale abafana bami abane kodwa nawo washiswa,” kusho uKhanyile.

Uthe abantu abazibiza ngekomiti lenhlalakahle bathi bafuna ukufaka umuntu. Kuthe uma bengavumelani nakushoyo babiza amaphoyisa. UKhanyile uthe amaphoyisa afika wase ewachazela mayelana nokuhlala kwezingane zakhe.

Uthe amaphoyisa anquma ukuthi bahlangane namuhla nalaba balisa baye ehhovisi likansumpa ukuze kuvele ubufakazi bokuthi amadodakazi akhe kufanele ahlale kuleliya gumbi. Uthi bavumelene kodwa kwashintshe esehambile amaphoyisa.

“Bashise nomfaniswano wezingane zethu ezinhlanu ezifundayo. Angazi ukuthi sizokwenzenjani. Bashise ngisho okokugqoka,” kusho uKhanyile.

Ikhansela laku-ward 89, uMnuz Mbangeni lithe bazimisele ngokuxoxisana namalungu omphakathi ngokwenzekile lathi kunezindlela ezilandelwayo uma kulungiswa isimo esithinta ukuhlaliswa kwabantu. UMjadu uthe akasekho ofuna ukuphumela obala ngokukhishwa kwezimpahla zalo mndeni.

Okhulumela amaphoyisa, uLt Col Thulani Zwane ukuqinisekisile ukuthi amaphoyisa aphenya icala lokucekela phansi impahla.

Newspapers in Zulu

Newspapers from South Africa

© PressReader. All rights reserved.