INatu ilwela othisha bakwaGrade R
KUFUFUSA isiteleka ngodaba lothisha bakwaGrade R njengoba inyunyana yothisha iNatu ithe bazoteleka uma kuphela le nyanga bengawutholanga uchatha.
Inyunyana ithe akekho uthisha oyilungu leNatu ozosebenza uma othisha sebeteleka.
UMnuz Allen Thompson, iPhini likaMengameli weNatu, uthe uNgqongqoshe weMfundo eyisiSekelo, uNkk Angie Motshekga, ubacele ukuthi bamnike ithuba kuze kuphele le nyanga ukuze kuxazululwe inkinga yothisha. Uthe bamnike kuze kuphele le nyanga ukuze axazulule zonke izinkinga ezithinta ukunganyuselwa umholo. “Uma kuphela inyanga kungekho mnyakazo siya esitelekeni. Akekho uthisha kuleli oyilungu leNatu ozosebenza sizobe sizwelana nothisha bakwaGrade R uma kuqala inyanga ezayo. Sizobe seseka labo thisha ngoba sekudlalwe ngabo kakhulu,” kusho uThompson.
Ukusho lokhu esithangamini nabezindaba eThekwini izolo.
Othisha abathintekayo abawutholanga uchatha kusukela ngoDisemba ngonyaka odlule.
Kumanje bahola uR6 500 ngenyanga kanti kwezinye izifundazwe bahola kahle.
UNgqongqoshe wezeMfundo esifundazweni, uMnuz Mthandeni Dlungwane, uzibophezele ekutheni bazolulungisa udaba lothisha wathi bangabantu ababalulekile.
UThompson ukhale ngokuthi labo thisha abanayo imihlomulo etholwa othisha abaqashwe ngokugcwele ngoba abaqashiwe ngaphansi komthetho oqashe abanye othisha.
“Uma ubheka indaba yokwenza kahle kwezinye izifundazwe, iGauteng yenza kahle kakhulu. Yingoba ibakhokhela kahle othisha bakwaGrade R ngoba ukuze u-matric wenze kahle kuqala kwaGrade R,” kusho uThompson.
Uthe ngoLwesihlanu banomhlangano lapho bezoqoqa khona lonke ulwazi banxenxe ukuthi kwesekwe othisha bakwaGrade R.
“Sifuna ukuthi uma sesiteleka sibe sesilandele yonke imigudu yezomthetho. Sifuna kube yisiteleka esisemthethweni. Sizohlangana nezigungu ezilawula izikole ukuze sithole ukwesekwa odabeni lwalabo thisha. Labo thisha babe noKhisimusi nePhasika elimnyama belinde umnyama ongenafu. Sekwanele manje ngeke sisonge izandla konakala,” kusho uThompson.