ICosatu ifuna kufezeke iphupho lokubuyiswa komhlaba
UMFELANDAWONYE wezinyunyana zabasebenzi, iCosatu, unxuse amalungu ayo ukuthi aqinisekise ukuthi izinqumo ezathathwa eNasrec, engqungqutheleni ye-ANC ngoDisemba ziyafezeka.
ICosatu ithe kumele indaba yokubuyiswa komhlaba ngaphandle kwesinxephezelo ingagcini iyiphupho.
Ekhuluma emhlanganweni weCosatu eThekwini izolo, uMnuz Mugwena Maluleke uNobhala jikelele weSadtu obuye ahole izingxoxo zabasebenzi kulo mfelandawonye, uthe abantu bakuleli kuphela abangenawo umhlaba.
“Ngeke sitshelwe amanye amazwe ukuthi umhlaba mawungadliwa ngaphandle kwesinxephezelo. E-United Kingdom akekho umuntu wokufika onobunikazi bomhlaba, umhlaba wonke wakhona uphethwe abantu bakhona,” kusho uMaluleke.
Uthe yikuleli kuphela lapho abantu bengenawo umhlaba wathi yingakho kumele leli phupho lifezeke.
“Kumele lifezeke iphupho lomhlaba ubuyele kubanikazi bawo,” kusho yena.
Uthe njengoba baphakamisa uMnuz Cyril Ramaphosa, wakhethwa waba nguMengameli we-ANC nezwe, sekumele basebenze kanzima.
“Sizohlangana noMatamela (Ramaphosa) sixoxe ngezinto esingeneme ngazo. Siyakhala ngokuthi abantu kwabakhethwa ebhodini lakwa-Eskom akekho noyedwa ozwelana nabasebenzi,” kusho uMaluleke.
Ukhale kakhulu nangalabo abafuna ukuzicaphunela esikhwameni sabasebenzi iPIC.
“Imali yethu le. Wonke umuntu ufuna ukutapuna nje kulo R1 trillion okulesi sikhwama sabasebenzi. Sizolwa ngoba kumele sibe nezwi kulesi sikhwama,” kuqhuba uMaluleke.
Unxuse abaholi abebekhona ukuthi bakhankasele i-ANC okhethweni lohulumeni basekhaya.
“Sizoxoxa neSACP mayelana nendaba yokuthi ingenele ukhetho ngokuzimela. Asikhankaseleni i-ANC, uma ingase ihlulwe i-ANC kumele niye eWestern Cape niyobona ukuthi abantu baphila kanjani khona njengoba kuphethe i-DA,” kusho uMaluleke.
Uthe uma i-ANC isiwine ukhetho bazokwazi ukuthatha izinqumo ngezinto okumele zenzeke kuhulumeni.
Uqhube waphawula ngomgubho wabasebenzi ozoba ngoMeyi 1.
“Asilwe nokulawulwa kombuso yidlanzana, ama-labour brokers nezinye izinto. Sidiniwe ngokunyuswa kweVAT ngo-1%, ukunyuswa kwayo kushaya abantu abahluphekayo, ogogo nathi nje singabasebenzi ngoba kunyuka yonke into.”
Uthe abasebenzi mabangathuswa nguNobhala jikelele weSaftu, uMnuz Zwelinzima Vavi, othi iCosatu yadayisa abasebenzi yamukela iholo eliphilisayo elincane.
“OVavi babanga umsindo nje, ningadukiswa yibona. Asibadayisanga abasebenzi.”
Uthe abaholi kumele basebenzele ababamele.
“Ningakhali uma ezinye izinyunyana zintshontsha amalungu enu. Asakhe amagatsha aqinile, sisebenzele abasebenzi