Ijikiwe inkulumo kaMalema
IPHENDUKE undabamlonyeni inkulumo yomholi we-EFF, uMnuz Julius Malema ikakhulukazi emuva kokuthi uMalema ekhale ngokuthi nabadayisi bakhona ukuzongcwaba umama wesizwe.
Uthe “Mama nalabo abaziqhelelanisa nawe usaphila bakhona namhlanje sebekhala ukudlula wonke umuntu. Sinike uphawu mama lokuthi senzenjani ngabo.”
Abantu besebesho noma yini ezinkundleni zokuxhumana abanye bekhala ngokuthi kukhona abadayisa izwe balinikeza umndeni wakwaGupta.
U@DubazaneJabu uthe “Nalabo abahamba ngama-vrrpha abasithathela izintombi zethu bakhona, sinike uphawu ukuthi sibenzenjani mama #JuliusMalemaChallenge,”
U@thuli_mashaba uthe ngisho amadoda afuna siye nawo ocansini ngaphambi kokusinika umsebenzi eminyangweni kahulumeni akhona la, Sinike uphawu ukuthi senzenjani ngawo mama #JuliusMalemaChallenge.
U@cale01b3 Ngisho nalabo abasula izandla zabo ezinamafutha ngama-cv balana mama, sinike uphawu lokuthi senzenjani mama#JuliusMalemaChallenge
U@mickeydedrinker uthe nalabo abadayisela izwe abafana bakwaGupta balapha mama, sinike uphawu lokuthi senzenjani ngabo #JuliusMalemaChallenge
U@Thulani_Mbonani uthe Mama, mama, Maah; ngisho labo ababengasifuni sisahlupheka balapha, sitshele ukuthi sibaphathe kanjani mama. Buya Mama siyakudinga#JuliusMalemaChallenge
Khonamanjalo uDkt Mbuyiseni Ndlozi okhulumela i-EFF kuzwelonke uyikhahlele ngazo zombili imibiko yokuthi i-EFF ihlela ukuba nomfelandawonye ne-ANC.
UNdlozi uthe okufanele kujatshulelwe wukuthi umngcwabo kaNkk Winnie Madikizela-Mandela uhlanganise izinhlangano zepolitiki zakwazi ukuba senkundleni yezemidlalo ngaphandle kokuklwebhana.
“I-EFF yinhlangano yabantu, abaholi bayo abasoze babhekelela izisu zabo kodwa basebenzela abantu ngaso sonke isikhathi. Azikho izingxoxo eziphakathi kwe-EFF ne-ANC. Thina sisebenzela abantu,” kusho uDkt Ndlozi.