Ushone ebalisa owafelwa yindodakazi
USHONE enesilonda ngokufa kwendodakazi yakhe engozini yemoto owesifazane wakwaBester, eNanda, okuthiwa ubelokhu ekhala ngokungacaci kophenyo oluthinta nephoyisa likaMasipala weTheku.
UNksz Nomthethwa Radebe (63) ushonele ekhaya ngoLwesihlanu emuva kokukhala ngokushisa kanti ubelokhu ebalisa ngokungasheshi kophenyo lokushona kwendodakazi yakhe, uCindy Radebe (35). Washona ngoMashi 28 engozini okwashayisana kuyo imoto ayehamba ngayo neyephoyisa likaMasipala. Engozini kwashona nozakwabo, uMnuz Clayton Saville, abebenenkampani yensimbi naye iCRO Enterprises and Projects ePinetown.
Umndeni kaCindy usola ukuthi wukungacaci kophenyo ngengozi okubulele uNksz Radebe. Elandisa Isolezwe uNksz Zanele Radebe okhulumela umndeni, uthe ngudadewabo oshone ngoLwesihlanu.
“NgoLwesine wakhala ngokuzwela ukushisa, bamyisa emtholampilo walashwa wabuyela ekhaya. Babona sengathi akabingcono bafuna ukumbuyisela ngakusasa kodwa wathi akasafuni ukuya emtholampilo. Uze wacela ukubizelwa izingane kanti uzovele ashone ngokushesha,” kusho yena.
Uthe isimo sikadadewabo saqala ukuba sibi kusukela kwashona indodakazi abebalisa ngayo. Indodakazi kamufi yashiya izingane ezine okuthiwa bese zisele naye. UCindy kuthiwa ubeyikho konke kunina ngoba ubondla umndeni.
“Emuva komngcwabo ngamshayela ucingo udadewethu ngakusasa ngifuna ukuzwa ukuthi usale kanjani. Ngamangala uma ekhombisa ukuthi akezwa ukuthi ukhuluma nobani. Kwangithusa lokho ngacela ekhaya ukuba bambheke nabo basho ukuthi abamqondi kahle ungathi nomqondo uyalahleka. Kuthe noma sengizombona kwakhe wahluleka nawukusho ukuthi ngiwubani. Selokhu ashonelwa bese eyaleza nokuthi akwenziwe njani uma eshona sixakeke ngoba ubengaguli,” kusho uNksz Radebe.
Umndeni uthe ufisa nokulekelelwa ngezindleko zomngcwabo njengoba usanda kungcwaba nendodakazi kamufi.
Ngokombiko wengozi otholwe umndeni kuthiwa babebane emotweni okwashona kuyo uCindy, ababili bayiswa esibhedlela kanti oyedwa okuthiwa usasesibhedlela. Kusolwa ukuthi imoto yephoyisa yangena irobhothi livalile, yashayisana neyoCindy zagingqika zombili eNew Germany.
Umndeni ufuna ukwazi ukuthi kwenzekani ngophenyo.
USenior Superintendent Paboo Sewpersad, okhulumela amaphoyisa kuMasipala weTheku, uthe bayazi ngale ngozi. Uthe imoto yayishayelwa yiphoyisa lesifazane elingomunye wabaphathi elalisemsebenzini.
“Iphoyisa alikabuyeli ngokugcwele emsebenzini kodwa lafika lazobhala isitatimende. Lukhona uphenyo esilwenzayo ngaphakathi kodwa sizothembela nakuleli elivulwe emaphoyiseni,” kusho yena.
Okhulumela amaphoyisa KwaZulu-Natal, uCaptain Nqobile Gwala, uthe kuphenywa icala lokubulala ngokungenhloso. UMnuz Moses Dlamini okhulumela i-Independent Police Investigative Directorate, uthe sebebikelwe ngalolu daba futhi baphenya ukuthi kungani lingavulwanga icala ophikweni lwabo.