Abasalanga osaziwayo kokaMadikizela
OSAZIWAYO bakuleli abasalanga kuhlonishwa iqhawe lomzabalazo, uMama uWinnie MadikizelaMandela, enkonzweni yomngcwabo wakhe obusenkundleni yezemidlalo i-Orlando Stadium, eSoweto ngoMgqibelo.
UZonke Dikana noThandiswa Mazwai bashiye inkundla ihlokoma ngezingoma abazicule kuvaleliswa leli qhawe.
UThandiswa ucule ingoma ethi Nizalwa Ngobani.
Kule ngoma uThandiswa ukhuluma ngamaqhawe ahlukene alwela inkululeko kuleli, kubalwa noMadikizela Mandela.
Iningi livele lasukuma lacula nale ntokazi kule ngoma, limemeza amaqhawe ahlukene.
Eqeda kuyicula kuchwaze inkundla, kwacaca ukuthi abantu bachazekile. NoZonke ecula ingoma ethi Viva, naye ushiye abaningi bechazekile ngisho ezinkundleni zokuxhumana.
UNtokozo Mbambo noLinda Bukhosini bashayelwe ihlombe.
USipho “Hotstix” Mabuse noDorothy Masuka nabo bajatshulelwe yiningi.
Inkulumo yomkhangisi waphesheya kwezilwandle uNaomi Campbell ivuse umunyu kwabaningi kuleli.
UNaomi ubonge ukwazana noWinnie wathi uthando amkhombise lona, lukhulu selokhu amazi.
Efunda inkulumo yakhe bezilokhu zehlile izinyembezi kuyena.
Kosaziwayo bakuleli abebesemngcwabeni kubalwa uNomzamo Mbatha, Zinzi Zungu, Musa Mseleku nenkosikazi yakhe uThobile uMaKhumalo nabanye.
NgoLwesihlanu emadolobheni ahlukene kuleli kwakunamakhonsathi okuhlonipha leli qhawe ngomculo.