IVuma nemizamo yokuvala izikhala zabashiyile
UMSAKAZO ozinze eMhlanga, eThekwini, iVuma FM, usuveze ukuthi uxoxa nabantu abahlukene ukuze kuvalwe izikhala zabasakazi abasanda kushiya kulo msakazo.
Muva nje lo msakazo ushiywe abasakazi okukhona kubo noZandile “Zeal” Dladla wohlelo lwasekuseni phakathi nezinsuku wajoyina uKhozi FM.
Kusenjalo kube sekuvela izindaba zokuthi umethuli wohlelo lwantambama phakathi nezinsuku, uTrevor Phillips odume ngoTP naye ushiyile njengoba kuthiwa umndeni wakhe usufudukele phesheya kwezilwandle, eLondon.
Kube sekulandela izindaba zokushiya kukaMathumo Manaka obengena ngempelasonto naye okuvele ukuthi ulaxaze lo msakazo wajoyina iThobela FM.
Okhulumela iVuma, uTee Van Heerden, ukuqinisekisile ukuthi ababalwayo bashiyile futhi bamatasa bathungatha abazovala izikhala zabo.
“Bakhona abantu esisezingxoxweni nabo ukuze kuvaleke izikhala ezivulekile kodwa asikafinyeleli esiphethweni nalabo esixoxa nabo,” kusho uTee.
Ebuzwa ukuthi ngabe lesi siteshi sizozimemezela nini izinguquko uthe okwamanje abakwazi ukuphendula umbuzo ofana nalowo.
Lesi siteshi sishiywa abasakazi baso nje izibalo zakamuva ngabalalela imisakazo ezaphuma ngonyaka odlule zakhombisa ukuthi iVuma inyukelwe abalaleli ngezinga eliphezulu kusukela yaqala ukuzwakala emoyeni.
Abaphathi bomsakazo bayijabulela indlela esenza ngayo bancoma ithimba abanalo labasakazi bathi lenza umsebenzi oncomekayo nsuku zonke emoyeni.