Ubone isimanga sethalente kwethulwa inhlolokhono
UMETHULI wezinhlelo, uPabi Moloi, usale ebambe ongezansi ngenxa yethalente alibone kwenziwa inhlolokhono yokuthungatha abethuli abasha bezinhlelo zeSABC3 ngoMgqibelo.
Intsha yaKwaZulu-Natal namaphethelo, ibiphume ngobuningi e-Exhibition Centre, eThekwini, izozama inhlanhla.
UPabi uthe ngaso sonke isikhathi uma kwenziwa inhlolokhono KwaZulu-Natal kuhlale kunento eyenzekayo abangajwayele ukuyibona kwezinye izifundazwe.
“Intsha yokuqala osuyibonile nawe, uyabona ukuthi yenze into yamehlo. Isifundazwe esingaphoxi lesi uma kwenziwa noma yini. Ngijabule ukuthi ngibe khona ukuzobona ukuthi kuhamba kanjani futhi angingabazi ukuthi ekugcineni oyedwa noma ababili bazobe bephuma la,” kusho uPabi.
Uthe bafuna umuntu ozithembayo futhi okwaziyo ukwethula izinhlelo ezithinta izinto ezehlukene ezenzeka ezweni.
“Sifuna umuntu owazi ngemfashini, ubumnandi, ipolitiki nakho konke okwenzeka kuleli. Sinezinhlelo ezehlukene kulesi siteshi,” kusho uPabi.
UDoulha Domingo wakwaSABC 3 uthe uhlelo luzoqala ngoMeyi ukukhonjiswa kuthelevishini.
“Inhlolokhono iqale ePort Elizabeth yadlulela eKapa njengoba sesilana eThekwini. Ngempelasonto ezayo sizobe siyoyivala eGoli. Khona silindele isibalo esikhulu sentsha eqhamuka ezindaweni ezehlukene,” kuchaza yena.
Intsha yokuqala eyenze inhlolokhono ihlabe umxhwele bonke akade bekhona, kucaca nje ukuthi iqale yaziqeqesha ngaphambi kokuza ngaphambi kwamajaji.
Amajaji abekhona eThekwini u-Ayanda Thabethe, othula iTop Billing, Ewan Strydom, othula uhlelo lwasekuseni, i-Expresso noTevin Naidu, othula uhlelo iMela.