Uzonyuka futhi uphethiloli ngoMeyi

ABASHAYELI bezimoto kufanele babophe izifociya njengoba uphethroli uzonyuka futhi ngoMeyi emuva kokunyuka ekuqaleni kwale nyanga.

Lezi zindaba zikhishwe yi-Automobile Association (AA) ebiphawula ngocwaningo lwayo lwaphakathi nenyanga elwenza ngokubheka intengo kaphethroli.

Abe-AA bathe uphethiloli uzonyuka ngo-41 cents, udizili unyuke ngo-48 cents bese upharafini unyuke ngo-38 cents.

Bathe lokhu kusho ukuthi uphethroli usunyuke ngo-R1 ezinyangeni ezimbili.

Baveze ukuthi uphethiloli unyuswa yizinkinga ezenzeka eMiddle East lapho kumbiwa khona uwoyela ongahluziwe.

“Izinqumo zamazwe amakhulu ngempi yaseSyria yizona ezinyusa intengo kaphethiloli. Uma udlame luqhubeka kusho ukuthi intengo kawoyela izomba eqolo. Abashayeli kufanele babophe izifociya ngoba usazomba eqolo ngenxa yokwenzeka eSyria,” kusho abeAA.

UNkk Mamello Matikinca oyiChief Economist eFNB, uthe abathengi kufanele babophe izifociya ngoba izindleko zokuphila zizomba eqolo kule nyanga.

“Abantu yikhona bezoyizwa kahle imiphumela yokunyiswa kwentela ekhokhwa uma uthenge izimpahla iValue Added Tax. Basazozwa nokunyuka kukaphethiloli okusho ukuthi impilo izoba nzima.

“Kufanele babophe izifociya ngoba asiliboni ibhange lombuso lehlisa i-repo rate kulo nyaka. Okusho ukuthi kufanele sizijwayele izindleko esinazo uma kuphela inyanga,” kusho uNkk Matikinca.

Uthe ucwaningo lwabo lukhomba ukuthi abantu bayaqhubeka nokukhithiza yize intela inyukile.

Ubadonse ngendlebe ukuthi bangalokothi baqale izikweletu ezintsha.