Osomabhizinisi bakhala ngowemfundo
ZIYAQONGA izinkinga zoMnyango wezeMfundo KwaZulu-Natal njengoba osomabhizinisi abasabalalisa izincwadi zezikole eziziphathela imali basabise ngokuthi bazokwenza noma yini ukuvikela lo msebenzi wabo.
Labo somabhizinisi abazibiza ngeLTSM Suppliers Forum bakhala ngokuthi umnyango ubaphuca iqatha ngokuthatha umsebenzi asebewenze iminyaka wawunika inkampani esabalalisa izincwadi ezikoleni eziphathelwa umnyango imali ezaziwa ngoSection 20.
Izolo bahlangane namalungu ekomiti lezemfundo esiShayamthetho beyozwakalisa ukungenami ngokuphucwa ilungelo lezikole lokuthi zizithengele izincwadi noma kubani.
UMnuz Mandla Shangase, ibamba likasihlalo walesi sigungu, uthe izikole eziziphathela imali ezaziwa ngoSection 21, zinelungelo eliqukethwe emthethweni wezikole ukuthi izigungu zazo zizithengele izincwadi noma kubani.
Uthe kodwa nyakenye umnyango uziphuce amandla lezi zikole ngokuthi ungayifaki imali ngesikhathi yokuthi zithenge izincwadi.
Uqhube wathi wabuye wayalela izikole ukuthi zingaqale zithembise ukuthi zizobakhokhela osomabhizinisi ungakasho wona ukuthi imali uzoyifaka nini.
“Imali kwezinye izikole yangena ngoNovemba, izincwadi kumele ngabe zafika ezikoleni ekupheleni kuka-Okthoba. Wakhipha amasekhula umnyango acacisa ngokusobala ukuthi ufuna ukusiphuca umsebenzi uwunike inkampani esabalalisa izincwadi ezikoleni ezinguSection 20. Siyazi ukuthi inkontileka nale nkampani yaphela ngonyaka odlule kodwa namanje isaqhubeka nokusabalalisa izincwadi. Umnyango uphinde wakhipha enye isekhula eyalela izikole ukuthi ngoLwesihlanu kumele kube sekufakwe ama-oda ezincwadi angonyaka ozayo. Sincane lesi sikhathi esibekiwe ngoba kwezinye izikole kusanda kuqokwa izigungu ezilawula izikole azikazinzi kahle,” kusho uShangase.
Uthe bambhalela uNgqongqoshe walo Mnyango, uMnuz Mthandeni Dlungwane nenhloko yomnyango uDkt Enock Nzama, ukuthi bayihoxise le sekhula ngoba sifishane isikhathi esisele.
Umnyango waveza ukuthi ngokwenza lokhu wonga u-R30 million ngoba othishanhloko bebenza umkhonyovu basebenzisane nosomabhizinisi abanyusa kakhulu imali yezincwadi bese bekhokha imali enkulu engabe bakhokha imali encane ngezincwadi ezifanayo.
UMnuz Kwazi Mthethwa, okhulumela uDlungwane, uthe bayayicubungula incwadi ebhalwe ilesi sigungu.
Amalungu ekomiti acele ukunikwa ithuba lokuthi azicubungule lezi zikhalo bese exhumana nazo zonke izinhlaka ngoba ezinye zezinto zithinta umthetho.