Sinyukile isibalo sabafe kwezePhasika
UNGQONGQOSHE wezokuThutha kuzwelonke, uDkt Blade Nzimande uveze ukuthi bangu-510 abantu abashone emigwaqweni yaseNingizimu Afrika ngesikhathi samaholidi ePhasika.
Uthe lesi sibalo sinyuke ngo-14% uma siqhathaniswa nesangonyaka odlule lapho kwashona abantu abangu-449.
“Izingozi esizibalayo zenzeke ngoMashi 29 kuya ku-Ephreli 9. Abantu abaningi bashone emigwaqweni yaKwaZuluNatal lapho kushone abangu-111, kulandele iGauteng nabangu-89, kuze iLimpopo nabangu-80 bese kuba ngezinye izifundazwe,” kusho uNzimande.
Lo mbiko ubewuthula ePhalamende izolo.
Uthe ubetshale amaphoyisa angu-18 900 ngamaholidi ePhasika ngoba ubefuna ukuqinisekisa ukuthi wonke umuntu uphephile.
“Izingozi zomgwaqo zidla uR300 billion emalini yezwe. Sikhathazekile ngokuthi asikwazanga ukwehlisa izingozi zomgwaqo kodwa sizoqhubeka nokutshala amaphoyisa ukuze abantu bazijwayeze ukuphepha emgwaqweni,” kusho uNzimande.
Uthe bangu-6 435 abashayeli ababoshelwe ukushayela ngesivinini esiphezulu, bangu3 208 ababoshelwe ukushayela izimoto ezingenazo izimvume zokuhamba emgwaqweni, bangu300 ababoshelwe ukushayela ngaphandle kwamalayisensi, abangu-2 344 baboshelwe ukushayela bengawafasile amabhande kuthi abangu-1 698 baboshelwa ukushayela izimoto ezinamathayi ayizimpandla.
Uxwayise abashayeli ngokuthi bashayele kahle futhi balandele imithetho yomgwaqo ngoba amaphoyisa azoqhubeka nokuqapha isimo. Mayelana nodaba lokuqanjwa kabusha kwesikhumulo samabhanoyi iCape Town International Airport, uNzimande uthe abakasenzi isinqumo sokuthi bazosiqamba ngobani njengoba kuphakanyiswe igama likaMengameli wokuqala wentando yabantu uMnuz Nelson Mandela, elikaMama weSizwe Nkk Winnie Madikizela-Mandela, elomholi weSACP ongasekho uMnuz Chris Hani nelomholi wePAC uMnuz Robert Sobukwe.
“Sisaxoxisana okwamanje, asikakasenzi isinqumo sokuthi isikhumulo saseCape Town sizoqanjwa ngamuphi umholi. Sisazothinta zonke izinhlaka okufanele ziphawule ngaphambi kokuthi sifinyelele egameni lomholi okuzoqanjwa ngaye,” kusho uNzimande.