Luzophothulwa ezinyangeni eziwu-6 uphenyo
UPHENYO olwenziwe ezinkampanini zakwaGupta ezisolwa ngokusebenzisa izitifiketi zomkokotelo zeBEE ukuze zithole izinkontileka zakwa-Eskom luzophothulwa ezinyangeni eziyisithupha ezizayo.
Lezi zindaba zivezwe yiBroad Based Black Economic Empowerment Commission (BBBEEC).
Leli komiti belithula umbiko walo ePhalamende izolo.
Uphenyo luthinta izinkampani zakwaGupta okuyiTegeta Exploration and Resource, Optimum Coal Mine neTrillian Consulting ezisolwa ngokusebenzisa izitifiketi zomkokotelo.
UKhomishana weBBBEEC uNkk Zodwa Ntuli uthe bazothula imiphumela yophenyo ezinyangeni eziyisithupha ezizayo.
“Sithole izikhalo ngezitifiketi zomkokotelo ezathunyelwa kwa-Eskom yiTegeta ne-Optimum nesahanjiswa yiTrillian. Sithole ukuthi lezi zitifiketi azikho sesimeni esifanele.
“Uphenyo ngeke luthathe izinyanga ezingaphezu kwesithupha,” kusho uNkk Ntuli.
UNkk Ntuli uphinde waveza ukuthi baphenya nezinkampani ezinkulu ngezinsolo zokungalandeli umthetho weBEE nokuveza abantu njengabanikazi bezinkampani ekubeni bengesibo (fronting).
Uthe phakathi kwezinkampani abaziphenya ngokungalandeli imithetho yeBEE kukhona iMTN Group ngohlelo lwayo lwe-MTN Zakhele, iSasol SA ngeSasol Inzalo neSouth African Social Security Agency (Sassa).
Uthe bazophenya nokuthi inhlangano enezibhedlela nama-ambulesi iNetcare iyayilandela yini imithetho yeBEE.
ISassa iphenywa ngenkontileka yayo eyayinika iCash Paymaster Services okutholakale ukuthi ayihambisani nemithetho yeBBBEE.
Uthe bathole izikhalo ezingu-334 kanti u-83% wazo ubuthinta udaba lokwenziwa izichuse kwabantu okuthiwa bangabanikazi bezinkampani.