Angiyi ndawo – Mahumapelo
BAZOTHUTHELEKA eNorth West namhlanje abaholi abaphezulu be-ANC emuva kokuthi amalungu ale nhlangano evuke umbhejazane efuna uNdunankulu uMnuz Supra Mahumapelo ehliswe esikhundleni. Imithombo iveza ukuthi angu-11 amalungu e-ANC kwisiShayamthetho saseNorth West atshele uMnuz Obed Bapela noNdunankulu waseNorthern Cape uNkk Sylvia Lucas ukuthi afuna kukhishwe uMahumapelo kwesikaNdunankulu.
UBapela noNkk Lucas yibona abajutshwe yi-ANC ukuthi balungise izinto eNorth West. I-ANC inamalungu angu-23 kumalungu angu-33 kwisishayamthetho saseNorth West.
I-EFF iyona ebifake isicelo sokuthi kube nevoti lokungabuthembi ubuholi bukaMahumapelo ebelizokwenzeka izolo kodwa lahoxiswa. Ibithembe ukuthi amalungu angu-11 e-ANC azovota nayo ukuze kukhishwe uMahumapelo uma evota ngokuyimfihlo.
Ukuvuka umbhejazane kwamalungu e-ANC kwenze uSomlomo uNkk Sussana Dantjie athumele iSMS etshela amalungu esiShayamthetho ukuthi uyalihoxisa ivoti lokungabuthembi ubuholi bukaMahumapelo.
UMahumapelo ukuqinisekisile ukuthi kunamalungu e-ANC ambophela amanqina enyathi esiShayamthetho uphinde wawabiza ngabathakathi. “Asitshele i-EFF ukuthi kusukela manje sizokwenza konke okusemandleni ukuthi babuye kwi-ANC. Imizamo yabo yokungikhipha iwubulima. Sizobahlula noma ngabe ivoti lenziwa ngokuyimfihlo noma esidlangalaleni. Noma uyangithanda noma uyangizonda okusalayo angiyi ndawo, yinkinga yakho leyo.”