Babuyisa isithunzi ngemiphumela Ohlange
SIZOBA nomgubho omkhulu woSuku lweNkululeko isikole samabanga aphezulu esakhiwa ngumengameli wokuqala we-ANC, uDkt John Langalibalele Dube, kwaphinde kwavota kuso uDkt Nelson Mandela, esisabhiyozela ukubuya kwesithunzi saso ngemiphumela ka-matric yanyakenye.
Usahleka kuvele elomhlathi onguthishanhloko wasoHlange High, eNanda, uMnuz Siyanda Nxumalo, uma ekhuluma ngemiphumela yanyakenye. Bathole u-90% okuyimiphumela abagcina ukuyithola ngaphezu kweminyaka eyisihlanu edlule. Lokhu kubuyise ugqozi kulesi sikole esinomlando, esingaphansi kwendawo yamagugu. Njengoba nonyaka kugujwa iminyaka engu-100 yokuzalwa kukaMandela, lesi sikole sifuna ukunyusa imiphumela ngo-5% ukukhombisa ukuthi sisakholelwa ezimisweni zabaholi bomzabalazo abayingxenye yomlando waso.
UNxumalo owafika kulesi sikole ngo-2012, uthe bekungamphathi kahle ukugida ku-70% .
“Sekuphele iminyaka engaphezulu kweyisihlanu sagcina ukuthola imiphumela emihle kanje. Yize kungakafiki lapho esifisa khona kodwa lokhu kuyizinkomba zokuthi sesiyabuyela ezifisweni zikaMafukuzela. Esikwenzile ukunganaki kuphela abafundi baka-matric kodwa siqinisa kuwo wonke amakilasi. Siqale ukuba nesikhathi sokufunda izincwadi kabili ngosuku kusukela kwaGrade 8. Bonke abafundi bangena ngo-7 ekuseni baphume ngo-4 ntambama ngoba sifuna ukubapheka besesemabangeni aphansi,” echaza.
Uthe ngokwabo bafisa ukungena ngo-6.30 kodwa basabela ukuphepha kwabafundi njengoba kudlange ubugebengu endaweni. Akuyona imiphumela emihle kuphela ebuyise isithunzi kulesi sikole kodwa abafundi ababili bathole o-A abayisithupha, nakho obesekuyinto abangayazi. Laba bafundi okunguSlindile Dlamini noLondiwe Madondo kuthiwa bashode ngamaphesenti ambalwa ukuthi bathole u-A esifundweni sesikhombisa. USlindile wenza izifundo zobudokotela e-University of KwaZulu-Natal kanti uLondiwe wenza i-Actuarial Science e-University of Cape Town. Bobabili bathole imifundaze njengoba kuthiwa bebebangwa yizinkampani zifuna ukubaxhasa. Bangu-27 o-A abatholwe abafundi baka-matric ngonyaka odlule. Kulo nyaka isikole sizokhiqiza abafundi baka-matric abebenza iMechanical Technology.
Ngezikhathi zakudala lesi sikole sasidume nangokuhamba phambili kwezemidlalo njengoba sike saholwa nguMnuz Vusumuzi Sangweni owayaziwa ngokugijimisa abafundi ekuseni ngovivi. Abafundi bakhona ababizwa ngamaZebra okuyigama elisuselwe esibongweni sikaDube, bebengathintwa kwezemidlalo, okuyinto lesi sikole esisabambelele kuyo. Lokhu kufakazelwa yizindondo nezinkomishi ehhovisi likathishanhloko.
UMnuz Boysie Mthethwa ophethe ezemidlalo, uthe bafuna ukubuyisa isiko abebedume ngalo kwezemidlalo. Uthe ngonyaka odlule abafundi abahlanu abadlala umbhoxo bebeyingxenye yethimba labayisikhombisa abamele iKwaZulu-Natal kwiWorld Schools Rugby, babuya nendondo yethusi. Babili abasasele esikoleni njengoba abathathu bebefunda u-matric. Ngawo unyaka odlule abafundi abadlala ibhola lezinyawo babe ngompetha kwiMafukuzelaGhandi Circuit Managers Cup.
“Ngo-2015 saqala ubudlelwano naMaZulu, okunabafundi abadlala kuwo esigabeni sokuthuthukiswa kwebhola. USphesihle Zulu obefunda uGrade 12 nyakenye usesayine naMaZulu ezingeni lokukhokhelwa. Bayisikhombisa abafundi abaqeqeshwa AmaZulu nonyaka kanti senza kahle nakweminye imidlalo okubalwa i-netball, table tennis nabagijimayo. SinoZanele Radebe ongumpetha we-table tennis esifundazweni,” echaza.
UNxumalo uthe basebenzisana kakhulu nabazali ukuthuthukisa isikole.
“Sikholelwa ekutheni umzali uyingxenye enkulu yokufunda kwengane. Abafundi bethu abazilandeli amaripoti kodwa siwanikeza abazali. Ngosuku abazowalanda ngalo, umzali uhlaliswa phansi nengane, uthisha amchazele ngemiphumela yakhe nangendlela aziphethe ngayo,” kusho uNxumalo.
Emgubhweni wenkululeko ozoba sesikoleni ngo-Ephreli 27 kulindele izikhulu eziphezulu zikahulumeni kanti kungenzeka kube khona noMengameli uMnuz Cyril Ramaphosa. NgoMashi 21 bekunomcimbi obizwa ngeHuman Rights Dialogue lapho abafundi bebenenkulumo mpikiswano ngemfundo yamahhala emanyuvesi.
Ngo-2015 abafundi ababefunda kudala basungula isikhwama sokulekelela isikole. Kulaba bafundi kukhona uNkk Thoko Didiza oyilungu lePhalamende, uMnuz Jabu Mabuza onguSihlalo webhodi lakwa-Eskom nabanye.
Nyakenye omunye wabafundi abasungule isikhwama unikele ngokwakha izindawo zokulala abafundi abahlala ngaphakathi. Abanye abafundi abakhiqizwe Ohlange kubalwa uDudu Khoza, Deborah Fraser, Sugar Ray Xulu, Nkk Bongi Ngema-Zuma, Victor Ntoni nabanye.