Kuyamangalisa okwenziwe nguMadikizela-Mandela
MHLELI: Kwelakho ngivumele ngibuye kule ngosi yodumo ngiphawule ngokuguqa kwenye yezingqalabutho zesizwe sakithi eNingizimu Afrika uMama uWinnie Madikizela- Mandela. Umama ubengumholi noma ubona ukuthi sekunzima kodwa ubema eqinisweni alibeke njengoba linjalo.
Ngibhala nje ngithanda ukuphonsela inselelo abahleli bezindaba ngicele ukuthi uma umuntu esaphila kubhalwe ingonyuluka ngaye, engusaziwayo noma usopolitiki. Ziningi izinto ezinhle ebezenziwa nguMadikizelaMandela obekufanele ukuthi abezindaba bazibhale bazise isizwe ngazo kodwa kunalokho bekugqama okubi ngaye. Ngiyabasola ngoba bekufanele baxoxe ngqo naye bathole okuningi ebesingakwazi ngaye bangagcini sebethatha izinto ezingamampunge nje okanye inzwabethi.
Okunye okugqamile kimina wukuthi ubengumholi ohleli nabantu elokishini eSoweto akayanga komntakabani ezindaweni zabadla izambane likapondo ngoba ngokwemali ayenayo wayengakwenza lokho kalula nje. Ngenxa yokuba nenhlanhla yokuba nomshana wami owabe ekuMkhonto Wesizwe owayengunogada kaMadikizelaMandela nami ngafunda lukhulu ngaye yize ezinye izinto ngingeke ngazibhala kule ngosi ngoba zazijule kakhulu. Phezu kwakho konke wukuthi ubengumama obathandayo abantu abasha, ethanda inhlalakahle, elwela inkululeko futhi ezimisele njengesishoshovu sepolitiki kwi-ANC. Lokho wayekwenza hhayi ngoba umyeni wakhe ayengumholi kodwa ngenxa yokuthi naye wayezimisele ngokulwela izwe ngokwakhe siqu.
Okunye, ngizophonsela inselelo omama bezepolitiki ukuthi mabangalujahi udumo kodwa aluzifikele ngesikhathi esifanele ukuze sibahloniphe nabo. Mabangabongwa ngabangani babo kodwa kube yisizwe esibachoma uphaphe lwegwalagwala.
Umama wema nabantu abasha ezikhathini ezinzima esengozini yokubulawa amabhunu nabacindezeli ababefuna ukuthi izwe libuswe ngabamhlophe kuphela hhayi esinye isizwe. Siyayibonga imisebenzi yakhe.