Abasakazi be-East Coast kwiBig Walk
UMJAHO waminyaka yonke – ohlelwa yi-East Coast Radio neDiscovery – iBig Walk ngoMeyi 20 uzongenelwa nangabasakazi be-East Coast Radio okokuqala nonyaka.
Ngokujwayelekile abasakazi baye babe neziteji lapho bezonandisa khona, baxoxe nabangenele kodwa kuzobe kuqala ukuthi nabo bahambisane nezihlwele.
Abasakazi bohlelo lwasekuseni bazongenela umjaho ka-5km bese kuthi uThandolwethu noJane Linley-Thomas bangenele oka-10km. Ithimba elenza uhlelo lwantambama lizongenela umjaho ka-20km. Isilomo somsakazo, uDamon Beard, uzongenela owokugijima ka-9km.
OyiGeneral Manager ye-East Coast Radio, uNksz Boni Mchunu, uthe bayajabula ukuthi umjaho uyakhula minyaka yonke.
“Umjaho ungomunye wemicimbi ebalulekile eThekwini futhi minyaka yonke siletha okusha. Kulo nyaka ingxenye yemali yokungenela izonikelwa enhlanganweni yabanokukhubazeka, iSaint Giles. Siyajabula ukuba phakathi kwabantu abasiza umphakathi odingayo,” kusho uBoni.
OyiNhloko yakwaDiscovery kwezokukhangisa, uNksz Lorna Maclean, uthe umjaho uhlanganisa imindeni kube wusuku lokuzijabulisa. Uthe bakukhathalele ukuzinakekela kwabantu baze bakhuthaze nokuthi bazivocavoce.
Ukungenela kuqale ngoMashi 25 kanti kuyaqhubeka kuze kube wuMeyi 2. Umjaho ka-9km, 5km no-10km ungenelwa ngo-R125, kube u-R120 ku-20km.
Umjaho, ohlukaniswe izigaba ezine, uheha izinkulunwange zabantu usuze uthathwe njengosuku oluhlanganisa umndeni.
Abahleli bawo bathe ukuhlukaniswa kwawo izigaba kwenzelwa ukuthi wonke umuntu akwazi ukuwungenela.
Yonke imijaho iqala eShaka Marine igudle ulwandle bese iphelela eMoses Mabhida People’s Park. Eminye imininingwane itholakala kwi-website ye-East Coast Radio nasekhasini labo kuFacebook.