Iziqu kumfundi obemncane kunabanye
KUFEZEKE iphupho kumfundi (19) wesikhungo semfundo ephakeme i-University of KwaZulu-Natal (UKZN) obe ngumfundi omncane kunabo bonke ukuthi athweswe iziqu.
UBulelani Msawakhe Mazibuko wase-Estcourt uthe uzwe inhliziyo yakhe ishaya mawala ngesikhathi eyothweswa iziqu zeBachelor of Arts kwipolitiki nezomthetho ngoMsombuluko.
Uthe ukwethweswa kwakhe iziqu bekuwumzuzu abewulindile.
“Ngijabulile futhi ngithobekile ngokuthi uze wafika lo mzuzu. Emuva kokujuluka nokukhala izinyembezi sekuze kwenzeka. Lo mzuzu ngiyohlezi ngiwukhumbula,” kusho uBulelani.
Uthe uqoke ukwenza izifundo abezenza ngoba efuna ukusiza umphakathi aphuma kuwona.
UBulelani uthe ubengeke aphumelele ngaphandle kokwesekwa wumndeni nabangani abebemgqugquzela.
“Ngesekwe kakhulu umndeni nabangani. Umama nobaba bebengishayela ucingo nsukuzonke bebheka ukuthi ngisesimeni esihle yini baphinde bangikhumbuze ngokubaluleka kokwenza izinto ezibalulekile kuqala. Iningi labangani bami lidala kunami lifana nobhuti bami abadala. Bengibukela kubona,” kusho uBulelani.
Umndeni wakhe nawo uveze ukuthi uyamjabulela ngokuthi abe ngumfundi omncane kunabo bonke ukuthi athweswe iziqu nokuthi aphothule izifundo zakhe esikhathini abebekelwe sona yize emncane.
UBulelani osaqhubeka nezifundo zakhe zobumeli e-UKZN ukhuthaze abanye abafundi wathi ababonele kuyena ngokuthi bazethembe basebenze kanzima. Uthe kubalulekile ukuthi bazazi ukuthi bafunani nokuthi bazitshele ukuthi bangaphumelela kulokhu abafuna ukuba yikho.
UBulelani, oqale ukwenza izifundo zemfundo ephakeme eneminyaka engu-15 uthe wayevele engenalo uvalo lokuthi ngeke aphumelele. Uthe wayazi ukuthi kungaba nezingqinamba endleleni kodwa ezitshela ukuthi uzophumelela.