Imqoka kweminye imizi eyezindlalifa
KUSHUBE isimo ngeledlule kuphela isizini yohlelo lwethelevishini Uthando neSthembu ngesikhathi uMnuz Musa Mseleku etshela amakhosikazi akhe ukuthi ufuna unkosikazi wesihlanu, ekhala ngokuthi isibalo sezingane asanele. Yize uMseleku ebegcizelela ukuthi ufuna izingane ezingu-20, okunye abekuqhakambisa wukuthi isibalo sabafana kasenele. Lokhu ubekususela esintwini lapho kwaziwa ukuthi umuzi ufana nofile uma ingekho ingane yomfana.
Amakhosikazi kaMseleku avuke umbhejazane echitha eyenkosikazi yesihlanu. Kuwaphathe kabi nokuthi kubonakala sengathi awawenzanga umsebenzi wawo ngenxa yokungabi nabafana abanele.
Kuhlukana imibono esikhathini samanje ngokuba nezindlalifa njengoba abanye bethi awusekho umsebenzi wazo.
UMbhishobhi Vusi Dube onamadodakazi amabili, uTehillah (18) noRuth (16), uthe akukaze kumkhathaze ukungabi nendodana. Uveze ukuthi ngisho esakhula akaze akuhlelele ukuthi ufuna ukuba nahlobo luni lwezingane yingakho ekwamukele nokuba namadodakazi wodwa.
UDube uthe akakholelwa ekubeni nendlalifa ngoba emndenini ubone behluleka indlalifa bese umuzi uvuswe amantombazane.
“Ubabomncane wayenayo indlalifa kodwa umuzi wavuswa amantombazane abenakekela kakhulu. Ngokwami akukho okubi ngokuba namantombazane esikweni nangokweBhayibheli.
Umuzi wami uyosala ume ngisho ngingenandodana ngoba amadodakazi ngisho angagana kodwa ngeke akhohlwe umuzi wakubo,” kuchaza uDube.
Uthe kumsizile ukwamukela izingane aziphiwe uNkulunkulu kunokubalisa ngendodana. Owesilisa ocele ukungadalulwa uthe watshela umkakhe bengakashadi ukuthi buyochitheka bugayiwe uma engamzalelanga indodana.
Unendodakazi nendodana emshadweni kanti uthe watshela umkakhe ukuthi uma engamzalelanga indodana uyophuma ayomfuna ngaphandle ozomzalela. Ukholwa wukuthi uyafa umuzi wendoda nesibongo uma kuzelwe amantombazane kuphela.
Oyisazi samasiko uMnuz Madoda Zungu, uyavuma ukuthi indlalifa ibisho lukhulu ngesintu sakudala.
Uthe indlalifa bekuba yindodana endala, kungakhathalekile ukuthi iyizibulo noma iphakathi nendawo emndenini.
“Le nto ihamba nokuthi ukholelwa kukuphi esikhathini samanje ngoba miningi imizi evuswa amantombazane. Ngisho ekhaya uma kunentombazane endala kufungwa yona ngoba ibalulekile. Indlalifa ithathwa ngokuthi ibalulekile ngoba kumele ithathe izintambo kuyise uma eshona. Ngisho uyise engasekho iyona eshisa impepho ekhaya,” kusho uZungu.