I-Gor ibambe umoya ngesifiso sokuphumelela ukuza eMzansi
OLWAYIZOLO luze lwaphela kungacaci noma izogcina iphumelele yini ukufika eNingizimu Afrika iGor Mahia yaseKenya okumele izobhekana neSuperSport United kowomlenze wesibili wokuzibekisela indawo kweyamaqoqo yeCAF Confederation Cup.
Leli qembu, elihamba phambili ngo 1-0 eliwuthole kowomlenze wokuqala eKenya ngasekuqaleni kwenyanga, libhekene nezinkinga eziningi ezihlanganisa imali yokugibela elithi alinayo, ama-visa nabadlali abamqoka kodwa abanenkinga yezinkontileka neqembu.
Ngokusho kuka-Omondi Aduda oyisikhulu esiphezulu seGor izolo emini, bebezongena endizeni ebheke kuleli izolo ngo-8 ebusuku. Lo mdlalo unamuhla ngo-7.30 eLucas Moripe Stadium. U-Aduda ubekhuluma nabezindaba eKenya izolo emini.
“Sibambe umoya ukuthi isifiso sethu sokufulathela leli ngo-8 ebusuku (esho izolo) sibe yimpumelelo. Kuze kube yimanje uhulumeni ubungakasiniki imali ebesicele ukuba usisize ngayo ukuze sikhokhele izindleko zalolu hambo. Inkinga enkulu lapha ukuthi uhulumeni uthe useyikhiphile imali wayinika usoseshini webhola eKenya kodwa (usoseshini) uyakuphika lokhu. Iqiniso ukuthi asazi ukuthi ubani okhuluma iqiniso nosenga ezimithiyo kubona,” kusho lesi sikhulu izolo emini.
Akuyona inkinga yemali kuphela kepha nama-visa bekunenkinga nawo khona izolo ngoba igunya lokungena eNingizimu Afrika kumele ulicele ngaphambi kwezinsuku ezinhlanu ngaphambi kokuthi ungene khona kodwa Isolezwe lithole ukuthi iGor yenze lokhu sekusele izinsuku ezine.
“Nakhona lokho sisalwa nakho ngethemba lokuthi uhulumeni uzosisiza ukuthi sikwazi ukuyodlala ngoba silwazi kahle ulaka lweCAF esizobhekana nalo uma singahluleka ukuya kulo mdlalo. Ngaphandle kwalokhu sihamba phambili ngakho-ke asizimisele ngokuphuthwa yithuba elihle kanje lokuyodlala kweyamaqoqo yeConfederation Cup. Sizozama konke okusemandleni,” uqhube kanje khona izolo u-Aduda.
Lesi sikhulu siqinisekise nokuthi uJacques Tuyisenge waseRwanda oshaye igoli okuyilona ehamba phambili ngalo iGor kowomlenze wokuqala, no-Ephraim Guikan wase-Ivory Coast, ngeke babe khona kulo mdlalo kwazise awabo ama-visa anqatshiwe. Likhona ithemba ngoFrancis Kahata yena osazanyelwa. Laba badlali ababili banqatshelwe ngoba behlulekile ukuveza amaphepha aqinisekisa ukuthi sebewuqedile unyaka besebenza eKenya. Kunethemba ngokuthi kuzoshesha okukaKahata ngoba ngowaseKenya kodwa bekunezinkinga ngamaphepha akhe amvumela ukuba aphume eKenya. Kuzolunga lokhu ngokusho kuka-Aduda.