UNgobeni akakanqumi ngekusasa likaBilliat
AYIFUNI ukuxhamazela ngekusasa likaKhama Billiat weMamelodi Sundowns imenenja yalo mdlali uMike Ngobeni weM-Sport Management okuyinkampani ephethe izindaba zalo mdlali waseZimbabwe.
UBilliat uyashiya kwiSundowns uma kuphela isizini ngoba inkontileka yakhe neqembu iphela ngoJuni.
UNgobeni utshele Isolezwe ukuthi akafuni ukuxhamazela ngekusasa lalo mdlali.
“UKhama unenqwaba yezicelo. Unezicelo ezivela eBelgium, Saudi Arabia, China, USA naseAzerbejain. Alikho iqembu esisasayine nalo inkontileka yesibambiso. Okwamanje asizimisele ngokuthatha isinqumo ngoba akukho lapho sijahe khona. Ngizothi ngithatha isinqumo manje kuqhamuke esinye isicelo esingcono. Ngakho sizolinda kuze kuphele isizini bese sithatha isinqumo esifanele,” kusho uNgobeni.
UBilliat ufike kwiSundowns ngo-2013. Kuleli qembu usenqobe zonke izicoco ezimqoka. Ukhale wemuka nezicoco ezimbili ze-Absa Premiership, eseNedbank Cup, Telkom Knockout, CAF Champions League neseCAF Super Cup.
“UKhama akaxabene neSundowns kodwa uyashiya ngenxa yokuthi ufuna ukuyokhulisa ulwazi lwakhe lwebhola phesheya kwezilwandle. ENingizimu Afrika usezinqobe cishe zonke izicoco ezimqoka. Yisikhathi sokuthi aye kokhula phesheya,” kusho uNgobeni.
UBilliat ungesinye sezethenjwa zeSundowns. Kule sizini useshaye amagoli ayisikhombisa yize engadlali njalo kwazise uhlale ahlale aphazanyiswe wukulimala.
“Njengamanje uKhama ugxile kwiSundowns. Ufuna ukuvala isizini ngenothi eliphezulu,” kusho uNgobeni.
ISundowns isethubeni lokuhlabana ngezicoco ezimbili. Ibihlezi esicongweni se-Absa Premiership ngamaphuzu angu52 ngemuva kwemidlalo engu-26 (ngaphambi komdlalo wayizolo neLamontville Golden Arrows. ISundowns ivule igebe lamaphuzu kwi-Orlando Pirates esendaweni yesibili ngamaphuzu angu-49 ngemuva kwemidlalo engu-27.
Izolo bekubhekwe ukuthi uBilliat asize iSundowns yelule igebe libe ngamaphuzu ayisithupha phakathi kwezakhe nePirates ngesikhathi bebhekene ne-Arrows emdlalweni we-Absa Premiership eLoftus Versfeld Stadium, ePitoli. Ngesonto iSundowns inomunye umdlalo omqoka njengoba izobhekana neMaritzburg United kowandulela owamanqamu weNedbank Cup.
Lo mdlalo useHarry Gwala Stadium, eMgungundlovu, ngo-3 ntambama. Kulindeleke ukuthi udle ngokushuba ngoba neTeam of Choice ayigayelwa mphako kulezi zinsuku. Leli qembu laseMphithi liyibambe endaweni yesithathi kwilog yePremiership nokukhombisa kona ukuthi lidlala kahle kule sizini esizosongwa.