Uyacacisa ngokweyamaniswa neKaizer Chiefs
UMQEQESHI weFree State Stars, uLuc Eymael, uphumele obala ngamahlebezi amkhomba kwiKaizer Chiefs esemkhankasweni wokuthola umqeqeshi ozovala isikhala sikaSteve Komphela ngaphambi kokuqala kwesizini ka-2018/2019.
Sekuphele izinyanga zingadluli izinkulumo zokuthi iChiefs ifuna u-Eymael eNaturena ngesizini ezayo phezu kokuba leli qembu lingafuni ukuziqinisekisa. U-Eymael ugile izimanga kwiStars ngesizini yakhe yokuqala efikile eBethlehem ecosha amaphuzu kuwona wonke amaqembu athathwa njengamakhulu eMzansi.
Emasontweni edlule usihlalo weStars, uMike Mokoena, uthe nakuba bejabule ngokwenziwa ngu-Eymael eqenjini futhi ebakhumbuza izinsuku zakudala kodwa bavule izandla uma efuna ukuhamba ekupheleni kwesizini. I-Ea Lla Koto imenyusele umholo u-Eymael emuva kokubona umsebenzi wakhe omuhle kuleli qembu. Amahlebezi akamuva amkhomba kwiSuperSport United esanda kuhlukana no-Eric Tinkler.
Izolo, esithangamini nabezindaba eBethlehem, u-Eymael uthe iChiefs ayikaze imthinte mayelana nomsebenzi. Waveza ukuthi maningi amaqembu amfonelayo.
“Ngiyazi ukuthi lezi zinkulumo zigcina zidala ubutha phakathi kweFree State neChiefs. Ngifisa ukucacisa ukuthi kuze kube yimanje akekho kwiChiefs oseke wangithinta meyalana nomsebenzi. Akhona amanye amaqembu amane adlala kwi-Absa Premiership angifonelayo.
“Kwesinye isikhathi bangifonela phambi kwesikhulu uRantsie Mokoena bangibuze ukuthi ngingedwa yini, ngivume. Ngiyabatshela ukuthi ngijabule lapho ngikhona. Uma kukhona iqembu engifisa ukuya kulona uyoba ngowokuqala ukumazisa ngoba ngiwumuntu oqondile nawe uyazi,” kusho u-Eymael.
IStars ingelinye lamaqembu ashaye into ecokeme ngesizini ka-2017/2018. Isendaweni yesithupha kwi-log yePremiership nokuyinto engakaze yenzeke kuyona.
URantsie uthe nakuba emethemba u-Eymael kodwa iminyaka ayichithe ebholeni imfundisile ukuthi kufanele ukulindele ukuphoxeka.
“Umqeqeshi neChiefs abangaphendula indaba yokuthi uyahamba yini. Lezi zinkulumo kade zaqala. Njalo uma umdlali noma umqeqeshi enza kahle ukhonjwa kwamanye amaqembu. Kusukela kuvele lezi zinkulumo sibe nemihlangano eminingi nomqeqeshi. Uvulelekile kimina nami kanjalo kuyena. “Sinenkontileka okufanele siyihloniphe, siyayazi imibandela yayo. Ukuthi sihlala sikhuluma ngeFree State Stars, sihlelela isizini ezayo kungenza ngithembe ukuthi uzoba sebhentshini uma kuqala isizini ka-2018/2019. Kodwa yibhola leli, njalo uma kuvula iwindi kuningi okwenzekayo. Kodwa ngingasho ngokuzethemba ukuthi uLuc uzoba nathi ngesizini ezayo. Ngikholwa wukuthi indlela iChiefs eyiyona nobudlelwano esinabo, ingasifonela kuxoxwe. Ngiyamethemba uLuc, siyaxabana naye kwesinye isikhathi kodwa konke kusuke kungenxa yeFree State,” kusho uRantsie.
I-Eymael uzohola iStars uma isidlala neChiefs emdlalweni owandulela owamanqamu weNedbank Cup eMoses Mabhida Stadium, eThekwini, ngoMgqibelo ngo-8.15 ebusuku.