UNEBHADI ELINGAJWAYEKILE UMDLALI OMQOKA WE-PIRATES
ANGAZI noma yibhadi leli noma kuziqondanele nje kodwa ngoba sengimdala futhi kade ngangibona, engingayala ngakho uThembinkosi Lorch ukuthi akahlabele amadlozi ngokushesha.
Okwenza uPotshoza akhulume kanje yingoba okwehlele lo mdlali kuyaqala ukwenzeka emhlabeni futhi kungenzeka kube nguyena yedwa obhekana nalokhu abhekene nakho emlandweni webhola.
I-Pirates ikhiphe isitatimende lapho ibicacisa khona ngabadlali bayo abalimele lapho kuvele khona ukuthi uLorch kuzomele aye kodokotela abayisipesheli ukuyohlola ihlombe lakhe. Nansi inkinga ngalokhu, uLorch ukhumuke ihlombe emakana noMbongeni Gumede waMaZulu zingu-15 ku-Ephreli 2018.
Nyakenye ngosuku olufanayo uLorch ukhumuke ihlombe bebhekene neHighlands Park. Okubi ngalokhu ukuthi okwangonyaka odlule kuphoqe uLorch ukuthi aze ayohlinzwa. Iqhawe lakho liyakuqonda okwenza iPirates itatazele ngalokhu kulimala kwakamuva ngoba yihlombe elifanayo leli elilimele. Akazange esabuya yaze yaphela isizini edlule okuyinto iPirates engayidingi njengamanje.
Iqhawe lakho uPotshoza selineminyaka ebholeni lakuleli kodwa elinje ibhadi alikaze lihlangabezane nalo. Kubi lokhu kwiPirates esembangweni wesicoco (yize ephika uMilutin Sredojevic) ngoba uLorch ungomunye wabadlali bayo abamqoka kule sizini futhi njengoba sekusele imidlalo emithathu ukuthi isizini iphele kulapho bese bemdinga khona kakhulu.
Abanye abadlali abalimele kwiBucs uma selikupotshozela iqhawe lakho, uMthokozisi Dube, Thabo Matlaba, Thabiso Kutumela nonozinti uWayne Sandilands (osuya ngokuphola umunwe omhluphayo).