Azoheha amateku anobuhlalu
AMATEKU ahlotshiswe ngobuhlalu ngabesifazane abahlanganyele emncintiswaneni wokuqokelela imali yokusiza abahlwempu kulindeleke ukuthi ahehe abaningi uma esegqokwe ngabazongenela iComrades Marathon.
UNkk Lindiwe Ngcobo noNkk Kho Shozi – abasebenzela esikhungweni iWoza Moya eHillcrest, eThekwini – baziphilisa ngomsebenzi wezandla. Bobabili bakhule ngawo futhi yiwo abaxosha ngawo ikati eziko.
UNkk Ngcobo uthe wafundiswa uninakhulu ukusebenzisa ubuhlalu, naye obeziphilisa ngomsebenzi wezandla. Amateku bawahlobisa ngobuhlalu, bawenza namaphiko ngabo. Bebefuna ukuveza ikhono emsebenzini wabo wokuhlobisa ngobuhlalu. Abangabazi ukuthi amateku abo azodla ubhedu emjahweni ngoba ubuhlalu ababusebenzisile obunemibala exubile, buyawathatha amehlo.
Bangenele umncintiswao iNational Craft Competition owenzelwe ukuqokelela isikhwama sabaphila negciwane lengculazi. I-Aids Centre Trust egqugquzele umncintiswano, ingenye yezinhlangano eziseka iComrades Marathon. Ngaphandle kokunikela esikhwameni umncintiswano kuthiwa ukhuthaza ukuthuthukisa amakhono amabhizinisi kwabesifazane.
Okhulumela iWoza Moya, uNkk Paula Thomson, uthe bahlose ukunikeza osomabhizinisi ithuba lokuziveza, bathole nemali yokuziphilisa. Abesifazane abangenele umncintiswano ngabanye abasebenzisana nabo ukwenza umsebenzi wezandla kulesi sikhungo.
“IWoza Moya ingenye yezinkampani nezikhungo eziyisihlanu ezisebenzisana nabahleli beComrades Marathon. Asingabazi ukuthi amateku esingenele ngawo umncintiswano azothatha amehlo, afunzelele nabagijimi. Umsebenzi wezandla awunakiwe kanti yilapho sibona khona ikhono kubantu. Kuyasijabulisa ukubona umsebenzi omuhle wezandla nsuku zonke, okukhuthaza nabanye abawubukela phansi,” kusho uNkk Thomson.
Uthe abenza umsebenzi wezandla njengoNkk Shozi noNkk Ngcobo abakutholi ukwesekwa ikakhulukazi emakhaya ngoba umsebenzi wabo awuthengwa kahle. Ukwenza imincintiswano yomsebenzi wezandla ngenye yezindlela zokuveza amakhono kubenzi bawo. Kuthiwa kusavulelekile nakwabanye abafuna ukungenela iNational Craft Competition evalwa kusasa.
Kungenelwa mahhala kodwa kudingeka ukuthi uthumele isithombe somsebenzi ongenela ngawo nge-email ethi: crafts@ innibos.co.za noma uthumele ku-071 621 3597 ngoWhats App. Kumele uthumele igama lakho nedolobha okulo nezinombolo zocingo. Iwu-60 imisebenzi okuzokhethwa kuyo. Imisebenzi yezandla izophinde ibe sembukisweni ozoba seMbombela, eMpumalanga, kwi-Innibos National Arts Festival eqala ngoJuni 24. Umcimbi wokukhetha abaphumelele uzoba ngoJuni 24 khona eMbombela.
Ophume phambili uzothola uR50 000, ophume isibili athole uR20 000 bese kuba uR15 000 kowesithathu.