Kuza iBio Africa Convention e-ICC
ZIJIKILE izinto e-Afrika njengoba kuzoba nengqungquthela enkulukazi egxile kubuchwepheshe obuthuthukisa impilo yabantu nomnotho, iBIO Africa Convention.
Le ngqungquthela izoba seNkosi Albert Luthuli International Convention Centre (ICC) ngo-Agasti 27 kuya ku-Agasti 29.
Kuzobe kudingidwa ngamathuba alethwa yiBiotechnology kwezomnotho, ezempilo, ekuthuthukiseni izitshalo nasekuthithibaliseni amagciwane ahlukene.
Kuzoba ngokokuqala iBIO Africa iza eNingizimu Afrika kwazise ivamise ukwenzelwa kwamanye amazwe.
Kulokhu izolethwa wuMnyango wezobuChwepheshe usebenzisana neTechnology Innovation Agency (TIA).
Kuzobe kukhona nezazi emkhakheni weBiotechnology, izinkampani zamazwe zaphesheya, ezase-Afrika nezakuleli ezigxile kulo mkhakha.
Indikimba yalo nyaka ithi, Africa-Open for Business: Together building the BioEconomy.
Abahleli bale ngqungquthela bathe le ndikimba ikucacisa ngokusobala ukuthi i-Afrika izimisele ukusebenzisa iBiotechnology ukuletha abatshalizimali bakwamanye amazwe, ukuthuthukisa umnotho nokuletha impilo engcono kubantu bakuleli zwekazi.
UDkt Siyabulela Ntuntela oyisikhulu esiphezulu se-AfricaBio, uthe iBIO Africa Convention yingqungquthela ehlanganisa zonke izinhlaka ezigxile kwiBiotechnology nezinkampani zakuleli, abatshalizimali nabanye abaneqhaza elibalulekile kulo mkhakha.
“Inhloso yokuhlanganisa abantu kwiBIO Africa Convention wukuthi beze nezindlela zokuthuthukisa iBio-economy e-Afrika ukuze abantu babe nempilo engcono kube kuthuthukiswa umnotho. IBiotechnology ibalulekile esikhathini samanje ngoba iyisixazululo sezinkinga eziningi esinazo emhlabeni nasezwenikazi lase-Afrika,” kusho uNtuntela.
Abafuna ukuba yingxenye yale ngqungquthela bangavakashela u-www. bioafricaconvention. com baphinde balandele okwenzekayo ekhasini lale nhlangano likaFacebook @ bioafricaconvention2018 nelikaTwitter @ BIOAfricaCon.