Kuhlukane inhloko nesixhanti ngesitebela
KUHLUKANE inhloko nesixhanti ngesitebele sabebeyizingwazi zomhlaba esibhakeleni obekubhekwe lukhulu kusona.
Nyakenye abashayisibhakela abathathu ababeke iNingizimu Afrika ebalazweni lomhlaba, uDingaan “The Rose of Soweto” Thobela, owayephethe ibhande le-World Boxing Council (WBC), Lehlohonolo “Stone” Ledwaba owayeshaya amaphiko kwi-International Boxing Federation (IBF) noJan Bergman owayengumpetha kwi-World Boxing Union (WBU), babumbe isitebele iTLB Promotions. Lokhu kubuyise ithemba kubashayisibhakela abahlale bekhala ngokuthi bafuna isibhakela siphathwe ngabantu abasidlalile nababaziyo ubuhlungu bokuba yibhokisa.
Isolezwe lithole ukuthi iTLB Promotions isizoqhubeka ngaphandle kukaThobela okuthiwa akayiniki isikhathi esanele. UThobela unamanye amabhizinisi eSoweto namaphethelo. Emasontweni edlule lesi sitebele sihlele izimpi zokuqala ebeziholwa nguXolisani “Nomeva” Ndongeni ePitoli.
“Sizoqhubeka nokusebenzisa igama nakuba uDingaan engaseyona ingxenye yeTLB. Kuyiqiniso ukuthi akaseyona ingxenye yesitebele ngenxa yokuthi umatasa ngezinto eziningi nokwenza angasitholi isikhathi saso,” kusho uLedwaba.
Ngesikhathi iTLB Promotions isungulwa uThobela ubekhuluma izinto ezinkulu ngayo eyibona njengesixazululo ezinkiyankiyeni ezibhekene nabashayisibhakela ababhekene nokuntula izimpi eMzansi. UThobela sekuneminyaka esebenzisana noNestor Tobias waseNamibia weMTC Sunshine Promotions osanda kugixabezwa ngomklomelo wokuba nguphromotha ohamba phambili e-Afrika yinhlangano yesibhakela i-World Boxing Organisation (WBO). Kubashayisibhakela abahlomulile ngalokhu kusebenzisana kukhona uThompson Mokwana obengumpetha we-SA Lightweight noMalcolm “The Stone” Klaasen.
Khonamanjalo, umpetha omusha we-WBO All Africa uSimpiwe “V12” Vetyeka, uyelulama esibhedlela emva kokushayiswa yimoto e-East London ngeledlule. Kuvele ukuthi uVetyeka (37) imshayise evula isicabha, ephuma kweyakhe, maqede yabaleka. Kuthiwa uphuke amathambo, imilenze yomibil, uma ukuhlinzwa kwakhe kuhambe kahle usazokwazi ukuhamba. UVetyeka owayengumpetha we-IBO bantamweight ne-World Boxing Association (WBA) Super featherweight, unyukele esisindweni se-Lightweight lapho afike wawina khona ibhande le-WBO All Africa ehlula uMokwana.