Uzithwese ijoka lokutakula iRichards Bay kwebheke ehlathini
USEZITHWESE ijoka lokutakula iRichards Bay egijima kwiNational First Division (NFD) uJomo Ntuli onikwe inselelo yokukhipha leli qembu ezembeni.
NgeSonto ligcwale umoya ibhantshi kuJean Luscuito obecija iqembu. UNtuli nguyena ogixabezwe ngomsebenzi wokutakula leli qembu. Exoxa neSolezwe ufunge wagomela ukuthi ngeke bagawulwe yizembe.
“Siyazi ukuthi ngeke kube lula kodwa sizolwa kuze kube yisekugcineni. Sisazodlala noBuntu Cape Town ekhaya okuwumdlalo okumele siwunqobe kwazise sisembamngweni ofanayo. Akukubi ngaleyo ndlela. Kumele sinqobe imidlalo yethu ngoba igebe phakathi kwethu namaqembu angaphezu kwethu alilikhulu, “kusho uNtuli.
I-Richards Bay iyibambe endaweni yesibili uma usuka ekugcineni. NgoMgqibelo ngo-3 ntambama iNatal Rich Boys izoshukana neBlack Leopards eThohoyandou Stadium.
“Kulesi sigaba sesizini awukho umdlalo olula. Nathi sibhekene nemidlalo emithathu enzima. I-Leopards ilwela ukuqinisa indawo yayo kweyokuhlunga kanti thina sibheke ukuvika izembe. Nokho amaphuzu siwadinga ngaphezu kwabo. Bona bangadumala uma bedliwa kubuye kuphole kodwa kithina ukudliwa kuzwela kakhulu ngoba kusho ukuthi sibheke ehlathini. Uma sigawulwa yizembe kusho ukuphela kwemisebenzi. Sonke silwela ukuvikela imisebenzi yethu kusuka kubadlali kuze kufike kithina ethimbeni labaqeqeshi,” kusho uNtuli.
IBay isiqoqe amaphuzu angu-28 emidlalweni engu-27. Ngempelasonto edlule ithelwe othulini yiSuper Eagles ngo 2-1 eMhlathuze Sports Complex, eRichards Bay. IBay izoshukana neLeopards, Ubuntu Cape Town neMbombela United.
“Leli yithuba lokukhokhela uJomo Biyela (ongusihlalo weqembu) ngokungethemba kwakhe enginika umsebenzi,” kusho uNtuli. Imidlalo yeNFD:
Kusasa: Cape Town All Stars v Highlands Park (Parow Park, 3pm)
NgoMgqibelo ngo-3 ntambama: Ubuntu Cape Town v Royal Eagles (Athlone Stadium); Mthatha Bucks v Jomo Cosmos (Mthatha Stadium); Uthongathi FC v Mbombela United (Princess Magogo Stadium); Black Leopards v Richards Bay (Thohoyandou Stadium); Super Eagles v Tshakhuma Tsha Madzivhandila (Goble Park); Real Kings v Pretoria University FC (Sugar Ray Xulu Stadium)