Ithemba lokuzenzela kumaSama kwabeKZN
LIKHULU ithemba leKwaZulu-Natal ngokuthola izindondo kumaSouth African Music Awards (Sama) akulo nyaka njengoba beyinqwaba abaculi bakulesi sifundazwe abaqokiwe.
Abaculi abaqokelwe emiklomelweni okuzoba ngeka-24 nonyaka, bamenyezelwe izolo ntambama eBirchwood Hotel, Ekurhuleni.
Abaculi bakulesi sifundazwe amagama abo avela ohlwini lwabaqokiwe kubalwa kubo u-Andile KaMajola, Cici, The Nameless Band, Distruction Boyz, Khuzani, DJ Merlon, King Bayaa nabanye abaningi.
Abaculi abaqokwe kakhulu yiMafikizolo eqokwe eminxeni emithathu, okungoweBest Afro Pop Album, Best Engineered Album noweBest Produced Album nge-albhamu yabo i-20. Babambisene neMi Casa eqokwe nge-albhamu iFamilia kwiBest Dance Album, Best Produced Album neBest Engineered Album.
USimphiwe Dana yena ungene kwiBest Live Audiovisual, Best Jazz Album nakwiBest African Artist.
Iqembu legqom’ laseThekwini iDistruction Boyz lingene eminxeni emibili weBest Collaboration ngengoma eyahlukanisa unyaka i-Omunye elipike kuyo uBenny Maverick noDladla Mshunqisi. Iqokwe nakwiBest Engineered Album.
Abaqokwe eminxeni weMale Artist of the Year, Female Artist of the Year, Duo/Group of the Year, Newcomer of the Year nowe-Album of the Year bazomenyezelwa ngenyanga ezayo. Isikhulu sakwaRiSA, okiyiyo eyengamele amaSama, uNhlanhla Sibisi, sithe umncintiswano wakulo nyaka ushube kakhulu.
Abanqobile bazomenyezelwa ngoJuni 2 emcimbini ozoba seSun City, eNorth West.