Odilikajele neminyaka kwabebebamba inkunzi
BAGWETSHWE odilikajele ababili neminyaka engu-40 enkantolo yaseMthunzini, ababulali abebengongqondongqondo ekubambeni inkunzi kuhlonyiwe, eMpangeni nakwezinye izindawo eziseduze nayo.
USiyanda Thwala (24) noSdumo Cebekhulu (30) bagwetshwe ngoLwesithathu ngecala lokubulala, elokudlwengula, elokuthumba nelokubamba inkunzi.
Isigameko sokuqala abagwetshwele sona senzeka ngoNovemba 24, 2015 eMngampondo, eShowe. Laba bagwaza babulala owesifazane owayedayisa esitolo.
Sebeqedile bathatha imali babaleka nayo. Umphakathi wazama ukubajaha kodwa babaleka. Ngakusasa uThwala wabonwa wumphakathi ehamba kuyo le ndawo.
Kwabizwa amaphoyisa, waboshwa ephethe isibhamu esingekho emthethweni. Emuva kophenyo olunzulu kwaboshwa omunye umbulali.
Olunye uphenyo lwaveza ukuthi laba benza elinye icala eMpangeni lapho baduna khona iToyota Tazz, babulala umshayeli wayo base bavalela umgibeli wesifazane ebhuthini lemoto.
Kuvele ukuthi babuye bamkhipha lo wesifazane ebhuthini bamdlwengula. Isibhamu esatholwa komunye umbulali kuvele ukuthi yisona esabulala umshayeli wemoto.
Bagwetshwe odilikajele ngamacala okubulala nelokudlwengula, iminyaka engu 30 umuntu ngamunye ngecala lokubamba inkunzi kuhlonyiwe, iminyaka emihlanu ngecala lokuthumba neminye iminyaka emihlanu ngecala lesibhamu nezinhlamvu.
Khona manjalo kwesinye isigameko inkantolo yaseNtuzuma igwebe uSifundo Gumede (26) iminyaka engu-15 ebhadla ejele ngecala lokubhokoda intombi yakhe ngommese.
UGumede ugwetshwe ngoLwesithathu ngecala lokubulala uNksz Ayanda Mkwayi (18). Lo wesifazane wagwaza ngoJulayi 2017 emgwaqweni uMusa, ngasehostela KwaMashu.
Kuthiwa laba baxabana, uGumede wavele wamgwaza kubuka umphakathi. Amalungu omphakathi ambamba umbulali athinta amaphoyisa, waboshwa.