Kulindwe isigungu ngoMahumapelo
UNDUNANKULU waseNorth West uMnuz Supra Mahumapelo usazohlala esikhundleni okwamanje yize kuqhubeka imibhikisho ehambisana nodlame lwabantu abafuna ehle kuso.
Izolo bekunombhikisho enhlokodolobha yaseNorth West, iMahikeng nabantu bebezitapela izimpahla ezitolo.
Abantu bebegqoke izikibha ze-ANC, bethi bafuna uMahumapelo ehle esikhundleni ngoba uyakhwabanisa.
UNobhala we-ANC eNorth West, uNksz Suzan Dantjie uthe imibhikisho ihlelwe ngabafuna ukufeza izinhloso zabo besebenzisa umphakathi.
“Abantu ababhikishayo siyabazi, kade babefuna ukuketula uMahumapelo. Bayaqhubeka basebenzisa umphakathi ukufeza izinhloso zabo. Kudala babezibiza ngeNorth West Business Forum manje sebezibiza ngeRevolutionary Council,” kusho uNksz Dantjie.
Ucele amaqembu aphikisayo ukuthi anike i-ANC isikhathi sokulungisa izinkinga zayo wathi abafuni ukutshelwa ukuthi benzeni.
Imithombo itshele i-Independent Media ukuthi amalungu e-ANC esiShayamthetho ayalelwe ukuthi angavoti ne-EFF uma sekuvotelwa ukungabuthembi ubuholi bukaMahumapelo.
Kuthiwa amalungu e-ANC atshelwe ukuthi angenzi lutho kuze kungenelele ubuholi obuphezulu odabeni lwaseNorth West.
Imithombo ithi ubuholi obubhekelele ukusebenza kweANC buphenya ngenkohlakalo esolwa kuMahumapelo nokuthi kungani engamiswanga uDkt Thabo Lekalakala emsebenzini emuva kokuthi engalandelanga imithetho yokuthengwa kwempahla ngesikhathi ekhipha ithenda kaR180 million.
Le thenda yanikezwa inkampani ehlanganiswa nomndeni wakwaGupta iMediosa.
Kuthiwa ikomidi elibhekelele ukusebenza kwe-ANC lizobe liKwaZulu-Natal ngeSonto nangoMsombuluko ukulungisa udaba lwamalungu angahambisani noMengameli wezwe uMnuz Cyril Ramaphosa.
“Basithembise ukuthi uma bebuya KwaZulu-Natal bazoza lapha eNorth West ukuzolungisa izinkinga esinazo,” kusho umthombo.
Uthe i-ANC izophinde ihlangane namadlelandawonye ayo iSACP, Sanco neCosatu ngaphambi kokuthatha isinqumo ngekusasa likaMahumapelo.