Bajame emgwaqweni kutelekiwe
BATHWALE kanzima abashayeli abasebenzisa umgwaqo iBayhead abajame amahora amathathu ngenxa yemashi yabasebenzi baseTransnet izolo eThekwini.
Umgwaqo, osetshenziswa kakhulu ngamaloli asuke ethutha impahla kwaTransnet nakwezinye izinkampani, uphazamiseke kusukela ngo-10 ekuseni kwaze kwashaya u-1 emini. Abasebenzi baseTransnet abatelekile bangamalungu eRevolutionary Transport Union of South Africa (Retusa). Phakathi kwezimfuno zabo wukuthi abaqashi kabafuni ukwamukela iRetusa. Ngaphandle kwabasebenzi baseThekwini nabaseRichards Bay nasePort Elizabeth bahlanganyele esitelekeni sosuku olulodwa.
Okhulumela iRetusa, uMnuz Joseph Dube, uthe banesibalo esanele ukuthi inkampani ibamukele kodwa kayifuni. Uthe inyunyana iqale ukungena eTransnet ngoJanuwari 2016 kodwa namanje abafuni ukuyamukela.
“Ngo-Agasti wonyaka odlule saba nomhlangano nezikhulu zeTransnet sesinamalungu awu-4 500. Bese sifuna ukubeka abazokhulumela inyunyana kuzo zonke izindawo ngoba sinawo amalungu ePE naseRichards Bay kodwa banqaba eTransnet. Basitshela ukuthi yiSouth African Transport and Allied Workers’ Union ne-United National Transport Union kuphela abayamukelayo. Nathi uMthethosisekelo uyasivumela ukuthi sinikezwe igunya. Sisebenzisa igunya lethu ngeSigaba sika-20 wezabasebenzi ukuthi umqashi amukele inyunyana,” kusho uDube.
Uthe udaba lwabo baludlulisela kwiCommission for Conciliation, Mediation and Arbitration kodwa nakhona izingxoxo zafika kwangqingetshe base benikezwa igunya lokuthi bateleke.
“Sihlele ukuthi amalungu ethu angasebenzi namuhla (izolo) ukuze sihambise incwadi yezikhalo ezikhulwini zeTransnet. Sizinikeze izinsuku eziyisikhombisa ukuthi zisiphendule. Uma singanelisekile yizimpendulo, sizoba nesiteleka esikhulu,” kusho yena. Phakathi kwabasebenzi abebemasha izolo kubalwa abasebenza emachwebeni, abalawula imishini nomakhenikha.
Esitatimendeni esithunyelelwe Isolezwe woyiNhloko yezokuXhumana eTransnet, uMnuz Molatwane Likhethe, uthe bebazi ngesiteleka sabasebenzi babo abangamalungu eRetusa. Uthe umsebenzi awuphazamisekanga kodwa kudaleke isiminyaminya kuyo yonke indawo emgwaqweni. Uthe kudingeke ukuthi baqaphe ngeso lokhozi yonke imigudu yabo ukuqinisekisa ezokuphepha. Akaphawulanga ngezimfuno zabasebenzi yize bezikhona emibuzweni ayithunyelelwe.