Izinyunyana zisho ukubopha umnyango
ZIYAVEVA izinyunyana zothisha KwaZuluNatal ngesekhula eyalela izikole ezizithengela izincwadi ukuthi zifake ama-oda namuhla noma uMnyango wezeMfundo esifundazweni uziphuce ilungelo lokuthenga izincwadi.
Izinyunyana zithi umnyango uzama ngayo yonke indlela ukuphuca amandla izikole nokugweva nemali ngokwenza lokhu. Uthe le sekhula engunombolo 21 ka-2018, esayinwe yinhloko yomnyango uDkt Enock Nzama, iyalela izikole ukuthi ezikhetha ukuzithengela kumele ziqinisekise ukuthi ama-oda afinyelela kuwona ngoLwesihlanu.
Ayikhalisi kuphela izinyunyana le sekhula kodwa nesigungu sezinhlangano ezithengela izikole ezingoSection 21 izincwadi, iLTSM Business Forum, sithi sincane isikhathi esinikwe izikole ukuthi zi-ode izincwadi zangonyaka ozayo.
UMnuz Allen Thompson, iPhini likaMengameli weNatu, uthe bazoya enkantolo uma umnyango uqhubeka nokuphuca amandla izikole.
Uthe nyakenye wakwenza lokhu lo mnyango wangayifaka imali, ekugcineni wagxeka izikole ngokuthi azizange zi-ode ngesikhathi.
Uthe bamatasa bahlangana nezikole nothishanhloko ngalolu daba. UNobhala weSadtu uNksz Nomarashiya Caluza uthe abomnyango bahlose ukuphuca amandla izikole ezizithengelayo.
“Izigungu zabazali azibhukule zilwe nale nto. Sizohlangana nothishanhloko bethu mayelana nalolu daba ngoba akukwazi ukuthi zingaphucwa amandla,” kusho uNksz Caluza.
I-LTSM Business Forum, ihlangane nekomiti lezemfundo esiShayamthetho izwakalisa ukuthi umnyango ufuna ukuyiphuca umsebenzi.
Phambilini izikhulu zomnyango ziholwa nguNgqongqoshe uMnuz Mthandeni Dlungwane, zivela kuleli komiti zathi isizathu esenza ukuthi ezinye izikole zigcine ziphuciwe amandla okuthenga izincwadi ngukuthi azizange zi-ode ngesikhathi. UNzama wathi bonga enkulu imali ebalelwa kuR30 million ngokuthenga izincwadi kanyekanye ngoba uma izikole zizithengela zibiza kakhulu.
UDlungwane, ekhuluma kwiGagasi FM, uthe kuphele unyaka sezifike zonke izincwadi ezikoleni ezithengelwa ngumnyango kodwa kwezizithengelayo abanye othishanhloko abazange bazi-ode ngesikhathi, okwenza kwaba nokubambezeleka ekufikeni kwazo.