Uzuze ezobudokotela wabuyisela umkakhe
UYEKISE umkakhe umsebenzi wamphindisela enyuvesi udokotela omncane obethweswa iziqu zePhD kwiPhysics e-University of KwaZulu-Natal (UKZN).
UDkt Sanele Dlamini (33) othweswe lezi ziqu ngoLwesithathu, usezimisele ukusiza umkakhe uNkk Nokuphiwa Dlamini ukuqedela ezakhe izifundo. Uthe ngesikhathi beshada ngo-2012 yena wayevele esesenyuvesi, watshela nomkakhe ukuthi abuyele enyuvesi ukuze akwazi ukuzimela. Umkakhe wenza iDiploma in Accounting eMangosuthu University of Technology (MUT). Ukuthola iziqu zePhD kwiPhysics uthe kungumphumela wokuzikhandla kwazise wayeyiphase ngo-50% iPhysics efunda u-matric.
Ngesikhathi ephothula u-matric eGrosvenor Boys High wathola u-A kwisiZulu kuphela.
“Ngicabanga ukuthi okunye okwenza ngingayiphasi kahle iPhysics wukuthi sakhula sitshelwa ukuthi inzima. Kwadingeka ngichibiyele u-matric ukuze ngithole imiphumela emihle njengoba bengifuna ukungena emkhakheni wakwaPhysics,” kuchaza uDlamini.
Wangena ngo-2005 e-UKZN waqala ngeBachelor of Science wagxila kwi-Applied Physics. Akaze ahlabe ikhefu ezifundweni njengoba elandelise ngeHonours neMaster’s Degree ngaphambi kokwenza iPhD.
“Sakhula sikhuthazwa ukuba ngothisha nodokotela, yingakho ngikhethe umkhakha owehlukile. Okwamanje angikasebenzi kodwa ngisaqhubeka nokwenza ucwaningo kulo mkhakha njengoba ngisasiza khona e-UKZN. Ngizimisele ukwenza umehluko kubantu futhi uma sengisebenza ngithole inkampani ezowuhlonipha umsebenzi wami,” kusho uDlamini.
Ubuye asebenze nePhumlani Dube Foundation ukukhuthaza abafundi baka-matric nabasemanyuvesi.
UDlamini nomkakhe babusiswe ngezingane ezintathu, okubalwa nenenyanga eyodwa.