Ikomiti lichithe eyentela yezicebi zodwa
NGEKE bakhokhe intela eyengeziwe omacaphunakusale baseNingizimu Afrika emuva kokuthi iJaji uDennis Davis lithe leli alikulungele ukuqoqa intela yabacebile bodwa.
Ikomiti likaDavis belibheka ukuthi bafanele yini ukukhokha intela yabo eseceleni abacebile kodwa lafinyelela ekutheni akukho okufanele kushintshe.
Yize uDavis evumile ukuthi igebe eliphakathi kwabacebile nabampofu likhulu futhi lidalwa wukuthi abanye kudala bathola umcebo kodwa uthe akufanele abantu bakhokhiswe intela yabo bodwa.
“Abacebile bakhokha intela yezimpahla, bayanikela, bakhokhela intela uma behweba ezimakethe. Ukuqoqwa kwentela yezigwili yinto esingakalungeli ukuyenza siyizwe futhi kusazothatha isikhathi,” kusho uDavis.
Uthe ngaphambi kokuthi kube nentela yezicebi kufanele kube nocwaningo nendlela ecacile yokuqoqa le ntela.
UNobhalala Jikelele weCongress of South African Federation of Trade Unions (Saftu), uMnuz Zwelinzima Vavi uthe baphoxekile ngokushiwo wuDavis ngoba imali yezicebi izosiza ukunciphisa igebe phakathi kwabampofu nabamnyama.
“Lisiphoxile ikomiti likaDavis ngoba abacebile kufanele bakhokhe intela ukuze sikwazi ukukhokhela imfundo yamahhala, abantu bathole izindlu nokunye abakudingayo,” kusho uVavi.
Uthe iyabacika nendaba yokuthi osomabhizinisi bakhala ngokuthi uma bekhokhiswa intela yezicebi bazobaleka kuleli.
IBusiness Unity South Africa (Busa) ithe ukukhokhiswa intela kwabacebile kuzobalekisa abatshalizimali, iyajabula ngeziphakamiso zikaDavis. UNkk Tanya Cohen weBusa uthe aziziningi izicebi eNingizimu Afrika ngakho ngeke ilunge intela yezicebi.
Uthe kufanele kuqoqwe ulwazi ngabakhokhi bentela bese abafihla imininingwane ethile bajeziswe.
USolwazi Bonke Dumisa uthe uvumelana noDavis ukuthi okwamanje iNingizimu Afrika ayikwazi ukuqoqa intela yabacebile bodwa ngoba kunabantu abakhokha intela eningi ngenxa yeholo labo kodwa bebe bengacebile.
“Kudala ngangingavumelani nabo ukuthi kunyuswe iVAT kodwa manje sengiyavumelana nabo njengoba igcine inyusiwe.
Intela yezigwili zodwa ayikwazi ukukhokhwa okwamanje ngoba ababaningi abantu abacebile eNingizimu Afrika futhi akucaci ukuthi izokwenziwa kanjani,” kusho uDumisa