Kucindezela ilungelo labantu okwenzeka KwaNdengezi
ESAHLUKWENI sesibili esigabeni sika-27 soMthethosisekelo waseNingizimu Afrika kubekwe kwacaca ukuthi wonke umuntu unelungelo lokuthola amanzi, ukudla, ukwelashwa kwezempilo nokuphepha.
Sicaciswe kanjena nje lesi sigaba kepha kubuhlungu izinhliziyo, impilo inzima futhi badiniwe abantu baKwaNdengezi, eThekwini, ngoba ilungelo labo libukeka licindezeleka.
Umphakathi wakule ndawo ubhekene nengwadla yokungabi nawo amanzi osekuphele amasonto engekho.
Kasibasoli ngokubhoka kwabo ngoba ukungabi namanzi kunzima kakhulu.
Ngaphandle kokucindezeleka kwelungelo eliqoshwe nakuMthethosisekelo, impilo iyaphazamiseka ngokungabi bikho kwamanzi.
UMasipala weTheku uyayichaza imbangela ngokuthi kuqhume ipayipi lamanzi elithile eliphakela KwaNdengezi kwafa nama-valve.
Uchaza nokuthi ithimba lawo limatasa lilungisa ipayipi ne-valve futhi ikhona imizamo yokwelekelela umphakathi njengokuthunyelwa kwamaloli amanzi, umphakathi ovele ukhala ngokuthi agcina ehambela kude.
Siyazi ukuthi kuyenzeka kube nezimo ezingalindelekile kunoma iyiphi impahla njengakho ukufa kwamapayipi kepha isiqala ukushayisa amakhala indaba yaKwaNdengezi.
Abantu bakhona bathi le nkinga yamanzi yaqala ngenkathi izwe liqala ukuhlaselwa yisomiso.
Kusukela ngaleso sikhathi amanzi alokhu ephela endaweni.
Nekhansela laku-ward 12 khona KwaNdengezi, uMnuz Vusumuzi Mbanjwa, likhathazekile ngalesi simo njengoba lithi selithinte zonke izinhlaka kwamasipala kodwa akulungi.
Lesi simo sisishiya nemibuzo yokuthi njengoba kucaca ukuthi inkinga yaKwaNdengezi akuyona eyamanje pho kungani engalungiswa ngokushesha lawo mapayipi nama-valve?
Ngabe kukhona yini okunye okungale okuholela ekutheni kugqoze ukulungisa indaba yamanzi njengoba kusola ikhansela?
Umasipala awuyilungise ngokushesha le ndaba, kungacindezelwa ilungelo labantu elikuMthethosisekelo.