Kuzofa abantu uma kuthiwa akujime noma wubani nje
NGIYAVUMA ukuthi nginomkhaba olengayo kodwa angifuni abantu bazenze ngcono ngami ngokuthi bathi angijime ngiqede umkhaba ukuze ngibukeke kahle.
Lesi sikhathi esiphila kuso simbi ngokuthi bonke abantu sebephenduke osiyazi bokweluleka ngokuthi akujinywe ukuze kuphilwe kahle.
Nongebani umuzwa ethi nkifinkifi kufanele ujime, umuntu ukhuluma ngokujima angakwazi naye kodwa akuzwa emaphephandabeni nakuthelevishini.
Kuyinto ecikayo ukuthi umuntu awole amawongowongo okujima ngoba efuna ukukhuthaza abanye abantu ukuthi abayojima ukuze babukeke kahle.
MaSolezwe, angifuni ukukufihla ukuthi angimthandi umuntu ongigqugquzela ngokujima ngoba ngimthatha njengomuntu osuke efuna ngidabule amafu ngishiye lo mhlaba nezinto zawo ezimnandi.
Umbuzo engizibuza wona ngowokuthi usuke ehloseni umuntu othi angijime kodwa angangeluleki ngokuthi kufanele ngihlolwe wudokotela ukuthi kungangilungela yini ukujima. Umuntu othi angingene emgwaqweni ngijime usuke eqonde khona ukungikhaphela ngiqonde ekufeni ngoba kusuke kungekho uhlelo anginike lona lokuvimba ukuthi ukujima kungangibulali.
Kulabo abangazi okaVolos ufisa bazi ukuthi ukujima kuyabulala uma ukuzela ngobuso. Uma ufisa ukujima kufanele uqale ngokuhlola isimo somzimba wakho.
Okokuqala okubalulekile okufanele kuqondwe ngabantu wukuthi ukujima kuyisayensi efaka isimo somzimba, ukudla okudlayo nezinto oziphuzayo.
Kuyingozi ukuthi ukujima kwenziwe uzifozonke ngoba ukujima akusoze kwamsiza umuntu odla ukudla okungenawo umsoco. Uma ugqugquzela umuntu uthi akajime kufanele uqale ngokumbuza ukuthi unakho yini ukudla okulungele umuntu ojimayo.
Kuyingozi ukuthi usukele umuntu ozidlela amagwinya nopholoni uthi akajime ehlise umzimba ngoba uvova umzimba kuphume amafutha amagwinya aqede angakufaki ukudla okuyimpilo.
Umthetho wokujima uthi umuntu kufanele adle ukudla okuthile ngaphambi kokuthi ajime, uma eseqede ukujima kufanele aphuze neziphuzo ezithile eziyizakhamzimba ezibuyisa amandla.
Kungenxa yalesi sizathu ngithi kuwubudedengu obungagcina bubulale umuntu ukuthi kuthiwe akajime kube kwaziwa ukuthi uziphuzela ugologo okanye ijusi.
Uma uthi umuntu akajime kufanele uzibophezele ekutheni uzomxhasa ngokudla neziphuzo eziyimpilo.
Umbuzo engizibuza wona uthi kusuke kuhlosweni uma kuthiwa umuntu ophuza ugologo akajime akhiphe ugologo egazini. Kusiza ngani ukujima ukhiphe ugologo kodwa uphinde uphuze wona ngoba ingekho into ongayiphuza, nosekuchaza ukuthi ujimela ukwakha amamasela awugologo.
MaSolezwe mina ngiyehluleka ukuqonda ukuthi yini kudlalwe ngomuntu kuthiwe akajime nesisu esigcwele uphuthu namazambane. Umuntu ajime akucuzise isisu esinojeqe uma eseqedile kufanele ayophuza amahewu okanye itiye elimnyama.
Umuntu ojima aqede adle izinto ezinganawo umsoco uyefana nomuntu ophethe isando aphihlize ngaso umzimba wakhe.
Yilesi sizathu okaVolos ethi yena akasoze avumela abantu badlale ngaye bathi akajime nesisu sakhe esigcwele isitambu.
Emlandweni wokujima angikaze ngizwe kuthiwa kukhona amamasela akhiwa yisitambu okanye umfudumezo wesishebo samazambane.
Njengomuntu omdala ngiyakhuza ngithi alehliswe leli haba lokujima ngoba kuyogcina kufe umuntu ejinyiswa aqede anganikwa izakhamzimba.