Iziqu zobudokotela kongumengameli we-ACU
UFUNA ukuba yisibonelo entsheni umholi wenhlangano yezepolitiki yezifundiswa, i-Academic Congress Union (ACU), uMntwana uMzonjani Zulu, izolo othole iziqu zobudokotela e-Unisa.
UZulu ongumengameli we-ACU ehlubuke kwiNFP ungomunye wosopolitiki abazibophezele kwezemfundo.
Uthole iziqu ezibizwa ngeDegree of Doctor of Educaton (DED) ngemuva kokuphumelela ekwenzeni ucwaningo mayelana nohlelo lwezemfundo ezikoleni olubizwa ngeCurriculum and Assessment Policy Statement (Caps).
UZulu oke waba nguthisha isikhathi eside ngaphambi kokuthi agxile kwezombusazwe ubebheka ukuthi abafundi bayayiqonda yini iCaps kwaGrade 9.
“Engikwenzile kumele kube yisibonelo entweni engiyikhulumayo njengoba thina siyiqembu elikhuthaza kakhulu imfundo. Ukuthola kwami lezi ziqu kuzoba wusizo kakhulu enhlanganweni nasesizweni jikelele,” kusho uZulu.
Uthe njengoba esethole lezi ziqu akagcinile, usazoqhubeka nokufunda ngoba uzimisele ngokuthi eminyakeni emihlanu abe esenguSolwazi.
“Kumanje ngenza izifundo zomthetho enyuvesi yaKwaZuluNatal. Lezi zifundo ngizenza ngoba ngifuna ukuqonda ukusebenza komthetho. Akufuneki ukuthi uma ungumholi wenze amaphutha ngoba nakhu ungaziqondi izinto,” kusho uZulu.
Uthe ukufunda ume ndawonye akusizi wengeza ngokuthi imfundo ibalulekile ngoba ulwazi olusha ludingeka nsuku zonke.
UZulu manje uneziqu ezinhlanu futhi usaphokophelele ukuthola ezinye.
Ubonge uSolwazi Jabulani Maphalala ngokubheka umsebenzi wakhe nokuholele ekutheni agcine ezuze iziqu zobudokotela.
“Thina sigqugquzela imfundo hhayi le nto yamanye amaqembu akhuluma indaba yokuthi kumele kubuye umhlaba, abantu bazowenzani umhlaba bengafundile? Nale nto yokunika abantu izijumbana zokudla ayisebenzi ngoba abantu uma befundile bangakwazi ukuziphilisa,” kusho uZulu.