OweChiefs neStars usho lukhulu
UMDLALO wakusasa weNedbank Cup phakathi kweKaizer Chiefs neFree State Stars, ubaluleke ngezindlela ezihlukile kuSteve Komphela, ocija Amakhosi, noLuc Eymael, oqeqesha i-Ea Lla Koto.
La maqembu azogadulisana kushunqe uthuli kowandulela owamanqamu weNedbank Cup, eMoses Mabhida Stadium, eThekwini, kusasa ngo-8.15 ebusuku.
UKomphela unyamanambana kubalandeli beChiefs njengoba engakaze awine lutho selokhu afika kumasizini amathathu awaqeda ngokuphela kwalena esiphethwa. Akungabazeki ukuthi lo mqeqeshi ufuna ukushiya okungenani ewine indebe eyodwa kuMakhosi ngoba sekucacile ukuthi ngeke abuye ngesizini ezayo.
Okwenza kuhlaluke ukuthi ngeke abuye wukuthi abaphathi beChiefs banengcindezi enkulu yokuqasha omunye umqeqeshi ukudambisa ulaka lwabalandeli. Abaphathi beqembu sebezithole
kaningi bekhipha izitatimende benxusa abalandeli ukuthi baziphathe kahle ezinkundleni, ikakhulukazi uma beshayiwe. UKomphela uyadinga ukuwina kusasa.
“Kuzoba wumdlalo onzima kodwa okuhle wukuthi sidlalile nabo emdlalweni weligi, siyabazi ubuthaka babo nalapho bemandla khona.Yisimo esifanayo nakithina. Kodwa imidlalo yomkhumulajezi uyayazi injani. Bazodlalela ukuzibulala. Ngikhumbula kwiTelkom Knockout, sakhishwa yibona lina izulu.
Sidlale nabo eBethlehem lina futhi. Angazi noma lizona yini eThekwini kodwa njalo uma sidlala neFree State liyana. Kodwa sibheke umdlalo omuhle. Okubalulekile kithina wukudlulela kowamanqamu,” kusho uKomphela. Ngakolunye uhlangothi u-Eymael ufuna ukukhombisa ukuthi le sizini yakhe ebe yinhle neFree State ebalwa namaqembu aphezulu kwilog ye-Absa Premiership, ayibanga yinhlanhla nje. Lo mqeqeshi ungomunye walabo abakhonjwa kwiChiefs ngesizini zayo. Ukushaya uKomphela kusasa kungagxiviza isitembu sokuthi u-Eymael nguyena okumele acije iChiefs. Emdlalweni weligi odlule kuwine iChiefs ngo 1-0 wegoli elingene ekugcineni lishaywa nguTeenage Hadebe ngekhanda. “Nakuba iChiefs inezinkinga okwamanje kodwa ngicabanga ukuthi noma udlala naliphi iqembu noma yikuphi emhlabeni, enkundleni niyalingana. Emdlalweni esahlulwa kuwona weligi asibanga nenhlanhla. KoweNedbank nginesiqiniseko sokuthi abadlali bethu bazozinikela ukuze sidlulele kowamanqamu.
Angibhekile ingcindezi iChiefs enayo, akuyona inkinga yami leyo. Sizokwenza konke okusemandleni ukudlulela phambili, ngethemba ukuthi sizoyihlula iChiefs. NjengaseBhayibhelini, wudaba lukaDavid noGoliath kodwa akunankinga,” kusho u-Eymael.