Kusewumqansana ukwamukela ezizishayelayo
UCWANINGO lwakamuva olwenziwe yiMazda Driver Project lukhomba ukuthi abantu abaningi abakubhekile ngabomvu ukuyeka ukushayela bese izimoto ziyazishayela.
Emasontweni ambalwa edlule, kube nesehlo lapho kushone khona umuntu ngemuva kwengozi yemoto ezishayelayo.
Lokhu kuqubule inkulumompikiswano ngokuthi ngabe izimoto ezizishayelayo zizoholela ekutheni kube nokuphepha emgwaqweni noma cha.
Ucwaningo oluningi oluhlukene lukhomba ukuthi izimoto ezizishayelayo zingase zithuthukise ezokuphepha.
Ukuze lokhu kufezeke, abashayeli kumele bazamukele lezi imoto.
NgokweMazda Driver Project, u-66% wabashayeli base-Europe bathi ukuthanda kwabo ukushayela kubenza bafune ukukwazi ukuqhubeka nokushayela ngisho ngabe sezikhona ezizishayelayo.
Umphathi weMasterDrive, u-Eugene Herbert uthe iNingizimu Afrika “inosiko lokushayela”.
Uthe lokho kungenza ukuthi izibalo zicishe zifane nezase-Europe.
“Ukuze sibone ukuphepha kumele kube nabaningi abemukela izimoto ezizishayelayo.”
Uthe izimoto ezizishayelayo zinalo ithuba lokuthi zinyuse ukuphepha uma isimo sivuma.
“Emazweni athuthukile kulula ngenxa yokuthi ingqalasizinda yakhona ithuthukile. Yize kunjalo kodwa la mazwe asazothwala kanzima okwamanje.”
Uthe emazweni athuthukayo njengeNingizimu Afrika, lokhu kusekude kakhulu.
“Yize izimoto ezizishayelayo zinalo ithuba lokuthi zenze imigwaqo iphephe kodwa kubukeka kusekude ukuthi kube yinto esizoyibona maduze. Kunezinto okumele zithuthukiswe kuqala kuwo wonke amazwe.” Nazi izinto ezibalwe nguHerbert:
Uzinzo kugesi: Yize ezinye izinkampani zicabanga i-hybrid, izinkampani eziningi zisondela kakhulu ngasezimotweni ezihamba ngogesi kuphela. Ngeke zande izimoto ezizishayelayo uma kunethuba lokuthi kungenzeka ube sesimeni lapho ungeke ukwazi khona ukushaja imoto. Iseyinde indlela iNingizimu Afrika okusamele iyihambe.
Ukuxhumana: Ongoti bathi i5G (enejubane loku-downloader elifinyelela ku-10 gigabits per second) yiyona nto ewumgogodla efunakalayo ukuze izimoto ezizishayelayo zisebenze kahle.
Yi-5G kuphela ezokwenza ukuthi izimoto zikwazi ukuthatha izinqumo ngokushesha kunokuthi zithumele ulwazi kwi-server ekude. Kusobala ukuthi iseyinde indlela okusamele ihanjwe ngamazwe asathuthuka ngaphambi kokuthi lokhu kwenzeke.
Ingqalasizinda: Yonke ingqalasizinda kumele yakhiwe ukuzwe ikwazi ukuvumela izimoto ezizihambelayo. Kuqagulwa ukuthi imigwaqo yase-USA idinga ukuthuthukiswa ngendlela efanayo nangesikhathi lapho kungena amabuggies esikhaleni samahhashi.