Izinombolo ezikhethekile zisho lukhulu
IYAKHULEKA intandane yamahazard, ithunywe abafundi bale ngosi.
Vula amasango singene sibuyele eceleni sithi gozololo singqumuze ezezimoto.
Ngithe ngisagabadula ezinkalweni ezikude ngibuka ubuhle baleli likaMthaniya ngivule umsakazo kungene izindaba, ngasekugcineni kufundwe udaba oluthinta indawo ekude le ezinqeni zezwe. Udaba lwakhona luthinta izinombolo zemoto i-number plate. Lana ezindabeni kuvele ukuthi kunomuntu ogoloza ukudayisela omunye i-number plate ekhethekile ebiza igama lemoto yohlobo oluphambili eyakhiwa amaNtaliyane.
Lolu daba lungenze ngadlinza, ngithe ngisacabanga kwadlula imoto enepuleti elibiza igama lomuntu noma angithi into ethize.
Leli puleti ngilazela emotweni eyayiAudi A4, ngabuye ngalibona selifakwe kwiToyota Fortuner manje selifakwe kwiHyundai H1. Kuyacaca ukuthi umnikazi uthutha nalo leli puleti lakhe. Kodwa-ke angiqondile ukukhula ngalawa abiza igama lomuntu abhalwa ngombala oluhlaza okotshani noma omnyama epuletini elimhlophe. Kungaba igama lenkampani, kepha ngihlose ukukhuluma ngawo wonke amapuleti nalawo ayizinombolo ezithi zijwayelekile kodwa zibe ezihleleke kahle nezisho lukhulu kumnikazi.
Ngiyakhumbula ukuthi eThekwini ave kunzima ukuthola izinombolo ezintathu kuya phansi. Uma ufuna lezo zinombolo kudingeka ukuthi ubekezele noma weshele umuntu onazo ukuze akudayisele ngemali enjengemali bese wena uzithuthela kuleyo moto yakho ofisa ukuthi iqhamuke kucace.
Abangakithi eNdwedwe bazokutshela ukuthi imoto ebiza uNDW 1 yiToyota Tazz emhlophe. Kunombhemu waseMlaza eningizimu yeTheku zonke ezakhe zinezinombolo ezimbili kodwa ezilamanayo.
Ngike ngalibhekisa ngapha ngaseNgwavuma enyakatho yesifundazwe lapho ngafica khona umkhehlekhehle wemoto ezifele ihleli nepuleti elinezinombolo ezimbili. Ngathi uma ngikhuluma nomakhenikha wathi umnikazi waleli veni akafuni ukulidedela leli puleti sekwale ngisho kuqhamuka abantu bemshela ngemali enhle ukuthi akabanikeze kodwa akafuni ukuqoma. Kunensizwa yaseMsinga uMnuz uSmanga Dez Mabaso. Yena-ke uziphathele uNF 1 uthutha nawo awufake ezimotweni zikanokusho. Lo mbhemu wangitshela ukuthi wawulanda kude lo NF 1 emva kweminyaka ewufuna.
Usuyabonake ukuthi izinombolo ezikhethekile zisho lukhulu. Izinombolo ezincane ziba yinyama uma leyo ndawo isikhule kakhulu njengamadolobha amakhulu othola ukuthi asenezinombolo ezevile kwezinhlanu epuletini elilodwa.
Kwesinye isikhathi kuba yizinombolo ezihleleke kahle njengo-12345. Omunye uyakwazi ukulandela izinombolo eziqondana nokuthize empilweni yakhe, okungaba wusuku lokuzalwa noma okunye.
Abanye-ke kuba nomlando ngalezo zinombolo mhlawumbe uthole ukuthi kwakungezemoto kamkhulu nakuba wena ungazibona zithule kodwa kuyena zisho lukhulu. Nami ngiyakhumbula ukuthi ekhaya kwake kwaba noChev Elcamino owawuthi NH 2448. Impela namanje ngisasho ukuthi uma ngingawuthola uNH 2448 ngingacela ngoba ungikhumbuza ikhehla lami.
Ezinye izinkinsela zingakhipha imali eshisiwe ukuze zithole izinombolo ezikhethekile qha. Abanye bachazwa ukuthi ziyalandelana navele esanazo afise ukuthi izimoto zakhe lilamane ngezinombolo.
Ngiyazi ukuthi usuqalile ukufisa ukwazi intengo yokubhalisa nokugcina lezi zinombolo. Ngokwe website yoMnyango wezokuThutha KwaZulu-Natal banohlu lwezinhlobo zama puleti. Umbono wama hazard uthi kungcono ukulivikela ipuleti lakho ungaliyeki lize likhahlelwe yi-system ungasalivuseleli. Ngisho noma ungenayo imoto uyakwazi ukulifaka ohlwini lwezinombolo ezingathintwa.
Uyothi usulidayisa eminyakeni ezayo liyobe selibiza imali ecishe ilingane neyokuthenga imoto. Noma-ke uzigcinele lona ukuze ulifake kule moto yakho kanokusho ofisa ukuyithenga mhlazane usuyinkinsela. Ungaxhumana noMnyango wezokuThutha ubabuze mayelana nemininingwane.
Uma ufisa siyixoxe kabanzi ngena ekhasini lethu likaFacebook Igedlela Lami with Sthembiso Shangase. Yimi owenu nali ikheli ngezansi hazardiso@gmail.com